Obama dró fram jákvæðu hliðarnar í stefnuræðunni

Síðasta stefnuræða Baracks Obama snerist um framtíðina, frekar en að einblína á þau mál sem hann vildi helst geta lokið við síðasta ár sitt í embættinu.

Hann lagði áherslu á að vekja bjartsýni meðal Bandaríkjamanna og draga úr ótta við umheiminn og óvini hvers konar.

„Við skulum byrja á efnahagnum,“ sagði hann snemma í ræðu sinni, „og einni grundvallarstaðreynd: Bandaríkin eru einmitt núna með öflugasta og haldbesta hagkerfi veraldar.“

Síðan kom að hernaðarmálunum: „Bandaríkin eru valdamesta þjóð á jörðu,“ sagði forsetinn. „Við verjum meira fé í herinn en næstu átta ríki samanlagt. Hermenn okkar eru besta herlið í sögu heimsins. Engin þjóð dirfist að ráðast á okkur eða bandamenn okkar vegna þess að þær vita að það væri leiðin til glötunar.“

Hann sagðist meira að segja ætla að sjá til þess að Bandaríkin gætu fundið lækningu við krabbameini: „Í þágu ástvina sem við höfum öll misst, í þágu fjölskyldunnar sem við getum enn bjargað, þá skulum við gera Bandaríkin að því landi sem læknar krabbamein í eitt skipti fyrir öll.“

Í ræðunni skoraði Obama á þingið, sem hefur verið honum ákaflega andsnúið í flestum atriðum, að fallast á ýmis þau mál sem hann hefur lagt áherslu á.

Þar má nefna lokun Guantanamo-fangabúðanna á Kúbu, en í fyrstu stefnuræðu sinni árið 2009 hét Obama því að loka þessum alræmdu fangabúðum.

Þá skorar hann á þingið að gefa heimild til hernaðar gegn vígasveitum Daish-samtakanna í Sýrlandi og Írak.

Enn fremur vonast hann til að geta sannfært þingið um að aflétta viðskiptabanni gegn Kúbu, sem hefur verið í gildi í meira en hálfa öld.

Með ræðunni virðist hann vilja gefa tóninn fyrir forsetakosningarnar í nóvember á þessu ári, þegar Bandaríkjamenn velja arftaka hans.

Andstæðingar hans í Repúblikanaflokknum gáfu lítið fyrir ræðuna: „Þetta var afneitunaræða frekar en stefnuræða,“ sagði Ted Cruz, ríkisstjóri í Texas, sem sækist eftir því að verða forsetaefni repúblikana í kosningunum næsta haust.

Obama hefur setið sjö ár í embættinu, og á rétt um ár eftir af seinna kjörtímabilinu. Samkvæmt stjórnarskrá geta forsetar Bandaríkjanna ekki verið nema tvö kjörtímabil í embætti.