Póstinum dreift annan hvern dag og verð hækkað

Íslandspóstur ætlar á næstunni að fækka dreifingardögum í annan hvern virkan dag í dreifbýlum og verðskrá fyrirtækisins hefur verið hækkuð um allt að 26,4 prósent. Framkvæmdastjóri Félags atvinnurekenda segir með ólíkundum að hækkanir séu ítrekað samþykktar þrátt fyrir að ekki sé vitað hver kostnaðargrunnur Íslandspósts er.

Ólafur Stephensen, framkvæmdastjóri FA, ítrekar á vef félagsins fyrri áskoranir til Ólafar Nordal, innanríkisráðherra, að hún láti gera úttekt á rekstri Íslandspóst og tryggi fullnægjandi eftirlit með fyrirtækinu.

„Ráðherrann hefur sagt að hún telji að afnema eigi einkaréttinn og selja Íslandspóst. Fyrst þarf að komast til botns í því hvort fyrirtækið hefur farið að lögum og reglum eða hvort einkaréttarreksturinn hefur verið látinn niðurgreiða samkeppnisrekstur. Annars er augljóslega vitlaust gefið við einkavæðingu,“ segir Ólafur.

Fækka dreifingardögum

Á vef Íslandspósts segir að þann 1. mars næstkomandi muni dreifingardögum fækka í annan hvern virkan dag á „dreifbýlissvæðum, þar sem kostnaður við dreifingu er þrefaldur eða meiri miðað við samskonar kostnað í þéttbýli.“

Á vef RÚV kemur fram að Íslandspóstur hafi sagt upp samningum við 37 verktaka. Landpóstum verður fækkað og störf þeirra sameinuð og þjónustusvæði stækkuð.

Þá hefur Póst- og fjarskiptastofnun heimilað Íslandspósti á undanförnum mánuðum að hækka gjöld um allt að 26,4 prósent á bréfapósti sem fyrirtækið hafi einkarétt á að dreifa.

Hækka verð

Á vef Félags atvinnurekenda er farið yfir hækkanir á verðskrám Íslandspósts í einkarétti.

Þar segir að A-póstur hafi hækkað úr 145 krónum 1. mars 2015 í 170 krónur 1. janúar 2016, eða um 16,1 prósent. B-póstur hefur á sama tímabili hækkað úr 125 krónum í 155 krónur, eða um 24 prósent. Þá hefur magnpóstur A hækkað úr 107 krónum í 130 krónur, eða um 21,5 prósent og Magnpóstur B úr 87 krónum í 110 krónur, eða um 26,4 prósent.

„Magnpóstur í B-flokki er sá póstflokkur sem mest er notaður, fyrst og fremst af fyrirtækjum til samskipta við viðskiptavini sína, og hefur jafnframt hækkað mest. Ríflegar hækkanir póstburðargjalda voru samþykktar í lok síðasta árs, þrátt fyrir að Póst- og fjarskiptastofnun hafi á sama tíma heimilað Íslandspósti að draga verulega úr þjónustu sinni í dreifbýli og dreifa pósti aðeins annan hvern virkan dag,“ segir á vef FA.