Sjaldgæfur janúar fellibylur stefnir á Asóreyjar

Fellibylur, sem fengið hefur nafnið Alex, stefnir nú í átt að Asóreyjaklasanum. Afar óvenjulegt er að fellibylir myndist yfir Atlantshafinu í janúar en slíkt hefur ekki gerst frá árinu 1938. Alex er fjórði janúarfellibylurinn sem vitað er um en skráningar hófust árið 1851. Þetta kemur fram á vef BBC.

Viðvörun hefur verið gefin út vegna veðurofsans á eyjunum sem tilheyra Portúgal og eru vestasti oddi Evrópu. Fellibylurinn mun líklega ná landi á morgun og er gert ráð fyrir að vindur nái fárviðrisstyrk og rúmlega það. Talið er að ölduhæð geti orðið allt að átján metrar.

Yfir Kyrrahafinu hefur annar hitabeltisstormur, Pali, myndast en hann hefur ekki enn náð fellibylsstyrk. Fellibylir eru ekki síður sjaldgæfir í Kyrrahafinu á þessum árstíma. Veðurfræðingar heimsins telja að stormana megi rekja til hás yfirborðshitastigs sjávar og sterkra vindstrauma í kjölfar þess að El Niño var óvenju öflugur að þessu sinni.

#Alex 1st Jan-born hurricane since 1938 & 4th known storm in Jan since records began in 1851 https://t.co/Muk6acgQq9 pic.twitter.com/m2Nctk2A84

— NOAA Satellites (@NOAASatellites) January 14, 2016