Katrín: Hver sem er getur farið að mynda meirihluta núna

Katrín Jakobsdóttir, formaður Vinstri grænna, mun hitta flokksmenn sína og forseta Íslands í dag til þess að fara yfir stöðu mála. Katrín sleit stjórnarmyndunarviðræðum í gær og óljóst er hver næstu skref verða.

„Staðan núna er sú að þessum viðræðum okkar lauk í gær. Á meðan það eru ekki formlegar viðræður í gangi þá getur hver sem er farið að mynda meirihluta þó einhver sé með umboðið,“ sagði Katrín í Bítinu á Bylgjunni. Hún segir stöðuna nokkuð flókna.

„Þetta eru sjö stykki í púsluspili sem virðast ekki passa nægilega vel saman. Það er bara þannig.“

Katrín segir það hafa komið sjálfri sér nokkuð á óvart að viðræðurnar hafi farið með þessum hætti. „Ég átti ekki endilega von á þessu í gær og að þetta myndi fara svona. Ég vissi alltaf að þetta væri ekkert í höfn, ég vissi það alveg, en átti ekki endilega von á að þetta myndi gerast.“

Katrín segir alla hafa unnið að viðræðunum af fullum heilindum, en að ekki allir hafi haft nægilega sannfæringu fyrir málefnunum. Vísar hún þá sérstaklega til Viðreisnar í þeim efnum. „Fólk verður að hafa fulla sannfæringu fyrir því að þetta sé rétta leiðin og það kom fram í gær að það voru ekki allir með þessa sannfæringu.“

Aðspurð hvort hún muni tala við Framsóknarflokkinn um mögulega stjórnarmyndun segist hún fyrst ætla að ræða við sinn flokk áður en næstu skref verði tekin.

Viðtalið við Katrínu má heyra í spilaranum hér fyrir ofan.