Englendingar enn í sárum eftir tapið gegn Íslandi

Adam Lallana, leikmaður Liverpool og enska landsliðsins, viðurkennir að leikmenn landsliðsins eru enn í sárum eftir tapið gegn Íslandi í 16 liða úrslitum Evrópumótsins í fótbolta í sumar.

Kolbeinn Sigþórsson skaut Englendinga úr keppni í Nice sem varð til þess að Roy Hodgson sagði starfi sínu lausu aðeins nokkrum mínútum eftir leikinn. Nýr kafli hjá enska liðinu hefst á sunnudaginn þegar það mætir Slóvakíu í fyrsta leik undankeppni HM 2018 undir stjórn nýs þjálfara, Sams Allardyce.

Aðspurður um tapið gegn Íslandi sem enskir hafa kallað það mest niðurlægjandi í sögu liðsins sagði Lallana á blaðamannafundi í gær: „Ég held að það verði alltaf sárt fyrir alla þá sem tóku þátt en við verðum að horfa fram á veginn. Það er það eina sem við getum gert,“ sagði Lallana.

„Við erum með nýjan stjóra núna og mikið af nýju starfsfólki þannig það er mikilvægt að við byrjum vel.“

„Við erum allir vonsviknir með það sem gerðist í sumar en Sam hefur komið inn með sýnar hugmyndir og aðra hugmyndafræði. Æfingar hafa verið mjög kraftmiklar. Þær hafa ekki verið margar en verið nokkuð góðar. Ég held að Sam viti að við erum með lítið sjálfstraust eftir það sem gerðist í sumar,“ sagði Adam Lallana.

Liverpool-maðurinn spilaði ekki leikinn fræga á móti Íslandi í Hreiðrinu í Nice á þessum dómsdegi enskrar knattspyrnu. Lallana telur þó að þetta tap hafi engin áhrif á hvernig Sam Allardyce meðhöndli liðið.

„Því miður fyrir fólkið í landinu þá brugðumst við í sumar og við erum ekki feimnir við að viðurkenna það að við áttum að gera betur. Við áttum að vinna Ísland og við vitum að það áttum við að gera,“ sagði Adam Lallana.