Nokkur vitni að árásinni verið yfirheyrð

Skýrslutökur standa nú yfir vegna rannsóknar lögreglu á hnífstunguárás í Vesturbæ Reykjavíkur í nótt.

Allar líkur eru á því að krafist verði gæsluvarðhalds yfir manni sem grunaður er um að hafa ráðist á annan mann en árásin átti sér stað utandyra á Sæmundargötu. Þetta segir Árni Þór Sigmundsson, aðstoðaryfirlögregluþjónn hjá rannsóknardeild lögreglunnar á höfuðborgarsvæðinu, í samtali við Vísi.

Mennirnir eru á þrítugsaldri og eru félagar. Meintur árásarmaður er grunaður um að hafa stungið félaga sinn með hníf í bakið en honum er haldið sofandi í öndunarvél á gjörgæsludeild Landspítalans.

Nokkur vitni að árásinni hafa verið yfirheyrð að sögn Árna. Þá er verið að yfirheyra manninn sem grunaður er um árásina.

Aðspurður hvaða áhrif það hefur á rannsóknina að ekki sé hægt að yfirheyra brotaþola segir Árni það vissulega geta stöðvað rannsóknina svolítið þar sem mikilvægar upplýsingar vegna hennar geti komið frá manninum.