Fyrstu sjúklingarnir kallaðir til meðferðar í næstu viku

Samstarfsverkefni íslenskra heilbrigðisyfirvalda og lyfjafyrirtækisins Gilead sem miðar að því að útrýma lifrarbólgu C á Íslandi er hafið.

Fyrstu sjúklingarnir verða kallaðir til meðferðar í næstu viku en átakið verður unnið í áföngum. Um 200 sjúklingar verða teknir til meðferðar hverju sinni.

Talið er að um 800 til 1000 manns séu smitaðir af lifrarbólgu C á Íslandi. Á næstu tveimur árum er stefnt að því að bjóða öllum sem greindir eru með smit meðferð með lyfinu Harvoni, þeim að kostnaðarlausu. Lyfjafyrirtækið Gilead leggur til lyfin og heilbrigðisyfirvöld greiða kostnað í kringum framkvæmd.

SÁÁ er samstarfsaðili í verkefninu. Meginhlutverk SÁÁ verður að setja upp sérstaka aðstöðu á sjúkrahúsinu Vogi til að meðhöndla sjúklinga sem greinast þar. Gert er ráð fyrir að það verði 200 manns á ári hverju. Einnig mun SÁÁ afhenda Landspítalnum persónugreinanlegar upplýsingar um þá sjúklinga sem kunnugt er um í skrám SÁÁ, til að hægt verði að bjóða þeim meðferð.

Lifrarbólga C er fyrst og fremst sjúkdómur þeirra sem sprauta sig með vímuefnum í æð. Fyrir meira en tuttugu árum hóf SÁÁ skimum fyrir veirunni sem veldur sjúkdómnum meðal þeirra sem komu til meðferðar á Vogi. Á því tímabili hafa rúmlega 900 tilfelli af lifrarbólgu C greinst á sjúkrahúsinu. Á sama tímabili hafa ár hvert 120-158 sjúklingar sem leggjast inn á Vog greinst með virka lifrarbólgu C.

Þórarinn Tyrfingsson, yfirlæknir hjá SÁÁ, segir meira en helming greinast áður en þeir verða þrítugir. „Þetta er sjúkdómur unga fólksins,“ segir hann og fagnar hann mjög átakinu. „Það er of oft að maður sé að tilkynna mjög ungu fólki og foreldrum þeirra að það sé með sjúkdóminn.“