Segir fullyrðingar um ofbeit vegna búvörusamninga út í hött

Sigurgeir Sindri Sigurgeirsson, formaður Bændasamtakanna, segir þá fullyrðingu ekki standast að með nýjum búvörusamningum myndi framleiðsla aukast á svæðum sem mættu ekki við aukningunni og leiða til þess að gengið yrði á landgæði. Jóhann Pétur Ágústsson, formaður Félags sauðfjárbænda á Vestfjörðum, lýsti yfir áhyggjum sínum af ofbeit vegna nýrra samninga í frétt Fréttablaðsins í gær.

„Þarna er hann að spá fyrir um að framleiðsla muni aukast á einhverjum ákveðnum svæðum. Það er ekki gott að segja til um það hvernig framleiðslan mun þróast. Hins vegar er hann að halda því fram að samningurinn leiði til þess að ofbeit verði á einhverjum svæðum. Það er algjörlega út í hött,“ segir Sindri.

Þá segir hann sérstaklega kveðið á um í samningunum að ná utan um beitarmálin. Það eigi að ráðast í sérstakt rannsóknarverkefni til að ná utan um mat á gróðurauðlindum. „Það þýðir að við ætlum með þessum samningi að tryggja enn og betri landnýtingu og að hún sé sjálfbær alls staðar á landinu,“ segir Sindri.

„Það er ekki þannig að menn gætu fjölgað alls staðar á svæðum þar sem er minni beit. Það mun ekki standast þennan samning. Þetta er út í hött,“ segir Sindri og bætir því við að eitt markmiða samningsins sé að tryggja sjálfbæra landnýtingu og fjármunir verði lagðir í að tryggja að hún verði sem best.

Jóhann Pétur lýsti áhyggjum sínum af því að samningarnir kæmu illa við sauðfjárbændur á Vestfjörðum. Sagði hann samninga jaðarfjandsamlega. Sauðfjárbændur samþykktu samningana í atkvæðagreiðslu í mars en sagði hann telja að nánast enginn á Vestfjörðum hefði greitt atkvæði með þeim.

Sindri segir ekki hægt að vísa til þess að ákveðin svæði lendi verr í þessu en önnur. Málið snúist um svokallað ásetningshlutfall, hlutfallið á milli ærgilda og fjölda fjár á fóðrum yfir veturinn. „Samningurinn kemur misjafnlega við bændur eftir því hvert þeirra ásetningshlutfall er. Það er mismunandi eftir svæðum og innan svæða,“ segir Sindri og bætir því við að einhverjir bændur á Vestfjörðum gætu komið vel út úr samningum á meðan aðrir kæmu verr út úr þeim.

Þá segir hann samninga kveða á um að Byggðastofnun eigi að útfæra svæðisbundinn stuðning. Þó sé ekki ljóst hvernig útfærsla Byggðastofnunar verði.