Borgin hækkar framlög til leik-og grunnskóla um hundruð milljóna

Borgarráð samþykkti á fundi sínum í dag aðgerðaáætlun í leik-og grunnskólum en hún var kynnt á blaðamannafundi í Ráðhúsinu núna klukkan 13.

Í tilkynningu frá borginni kemur fram að í áætluninni felist aukning á framlögum til skólanna á þessu hausti vegna sérkennslu, efniskostnaðar, langtímaveikinda starfsmanna, skólaaksturs og faglegs starfs upp á hundruð milljóna króna.

Þá munu fæðisgjöld sem foreldrar greiða vegna máltíða í leik-og grunnskólum hækka um 100 krónur á dag frá og með 1. október næstkomandi og munu þeir fjármunir fara óskiptir í hráefnisinnkaup til að bæta gæði matarins í skólanum.

Framlög til kaupa á námsgögnum hækka jafnframt; fara úr 1800 krónum á barn í 3000 krónur. Þá verður 24,8 milljónum veitt á þessu hausti til þess að efla faglegt starf á leikskólum borgarinnar og 60 milljónum króna verður veitt til faglegrar stjórnunar í grunnskólum borgarinnar í haust.

„Aðgerðaáætlunin sem er í tíu liðum var samþykkt í borgarráði í morgun. Undanfarna daga hefur borgarstjóri, ásamt formanni skóla- og frístundaráðs, og embættismönnum skóla- og frístundasviðs, fundað með samráðshópum leikskólastjóra og grunnskólastjóra. Boðað var til fundanna í tengslum við umræðu um fjármál leik- og grunnskóla í Reykjavík. Í kjölfar þessara funda var lögð lokahönd á gerð aðgerðaáætlunar í tíu liðum sem á að bæta skólastarf í borginni. Aðgerðaáætlunin var borin undir sömu samráðshópa og athugasemdir teknar til greina,“ segir í tilkynningu Reykjavíkurborgar.

Aðgerðaáætlunin er eftirfarandi:

·         Sérkennsla, langtímaveikindi starfsmanna og skólaakstur

Leikskólar og grunnskólar fái aukið fjármagn vegna langtímaveikinda starfsmanna, sérkennslu og skólaaksturs. Alls er um að ræða um 679 mkr. vegna haustsins 2016.

 

·         Meira fé til hráefniskaupa vegna skólamáltíða

Fæðisgjald verður hækkað í leik- og grunnskólum um 100 kr/dag frá 1. október nk.  Þeir fjármunir munu fara óskiptir í hráefnisinnkaup til að bæta gæði máltíða.  Skólar í Reykjavík munu eftir breytinguna búa við sambærileg framlög til hráefniskaupa og þau sveitarfélög sem leggja mest í matarinnkaup fyrir skólana.

 

·         Framlög til kaupa á námsgögnum í leikskólum hækka umtalsvert

Framlög til kaupa á námsgögnum til skapandi starfs í leikskólum hækka úr 1.800 kr. á barn  í 3.000  kr.

 

·         Efling faglegs starfs í leikskólum

Meira fjármagni, alls 24,8 mkr. á þessu hausti verður veitt til faglegs starfs í leikskólum með viðbótarframlögum til undirbúningsstarfa fagfólks sem og ófaglærðra starfsmanna. Efling faglegs starfs í leikskólum verði jafnframt skoðuð við gerð fjárhagsáætlunar fyrir 2017.

 

·         Efling faglegs starfs í grunnskólum

Auknu fjármagni eða  60 mkr. verður veitt til faglegrar stjórnunar í grunnskólum haustið 2016. Efling faglegs starfs í grunnskólum verði jafnframt skoðuð við gerð fjárhagsáætlunar fyrir 2017.

 

·         Inntaka barna fæddra í mars og apríl 2015

Opnað verður fyrir inntöku barna sem fædd eru í mars og apríl 2015 á leikskóla borgarinnar frá og með áramótum 2017. Nákvæm dagsetning inntöku í hverju tilviki verður þó háð rými og stöðu starfsmannamála á viðkomandi leikskóla. Jafnframt verður ráðist í sameiginlegt átak með fagfélögum leikskólastarfsfólks um nýliðun og fjölgun leikskólakennara með það fyrir augum að gera starf á leikskólum eftirsóknarverðara.

 

·         Endurskoðun úthlutunarlíkana leik- og grunnskóla og frístundamiðstöðvar

Unnin verði ný úthlutunarlíkön fyrir leikskóla, grunnskóla og frístundamiðstöðvar sem byggð eru á fyrirliggjandi gögnum og frekari fjárhagslegri greiningu á rekstrinum. Úthlutunarlíkönin taki gildi fyrir skólaárið 2017-18.

 

·         Meðferð á halla frá 2015

Leik- og grunnskólar þurfi ekki að mæta halla vegna 2015 á árinu 2016.  Staða einstakra starfstaða verður metin í ljósi ábendinga stjórnenda um óviðráðanleg ytri skilyrði.

 

·         Hækkun framlaga vegna kjarasamningbundinna launahækkana

Við undirbúning fjárhagsáætlunar fyrir árið 2017 er gert ráð fyrir að fjárveitingar til skóla- og frístundasviðs hækki vegna kjarasamningsbundinna hækkana launa sem gerðir voru í lok árs 2015. Hækkunin milli áranna 2015 og 2017 eru 3,3 milljarðar kr, þar af 1 milljarður króna á árinu 2016. Þegar náðst hafa samningar um kjör grunnskólakennara við félag grunnskólakennara mun þessi upphæð hækka enn frekar.

 

·         Bætt upplýsingagjöf og aukinn stuðningur við starfsstöðvar

Lögð verði áhersla á bætta upplýsingagjöf, aukna ráðgjöf og stuðning við stjórnendur sem þess óska varðandi fjárhag og rekstur sinna starfsstöðva.