Ólafur Andrés sænskur meistari með Kristianstad

Ólafur Andrés Guðmundsson og liðsfélagar hans í Kristianstad tryggðu sér sænska meistaratitilinn með 27-18 sigri á Alingsås í úrslitaleik um titilinn.

Kristianstad sem hafði titil að verja í dag byrjaði leikinn af miklum krafti og hleyptu leikmenn liðsins Alingsas aldrei inn í leikinn. Var þetta annað árið í röð sem þessi lið leika til úrslita um sænska titilinn.

Kristianstad leiddi með tólf mörkum í hálfleik 18-6 og voru úrslitin því löngu ráðin þegar leiknum lauk með níu marka sigri Kristianstad.

Ólafur lauk leik með tvö mörk en Iman Moorchegani átti stórleik í liði Kristianstad með átta mörk.