Óvissa með innritun yngstu barnanna í leikskóla

Óvíst er hvort að börn fædd í byrjun árs 2015 fái pláss á leikskólum borgarinnar í haust þrátt fyrir að leikskólabörnum fækki þá verulega þegar börn fædd árið 2010 hefja skólagöngu.

Reykjavíkurborg er þessa dagana að ljúka við að úthluta börnum fæddum árið 2014 leikskólaplássum fyrir haustið. Undanfarin ár hefur verið reynt að úthluta ekki aðeins börnum sem verða tveggja ára á árinu sem innritað er plássi. Heldur einnig börnum sem verða orðin átján mánaða á komandi hausti. Það eru börn sem fædd eru í janúar og febrúar í árganginum á eftir. Óvist er hvort sú leið verði farin í ár.

Skóla- og frístundasviði Reykjavíkurborgar er gert að spara nærri 700 milljónir króna á árinu og plássin fyrir yngstu börnin kosta mest. Þannig ákváðu borgaryfirvöld árið 2011 að taka engin börn fædd árið 2010 inn á leikskólana í sparnaðarskyni.

Helgi Grímsson, sviðstjóri skóla- og frístundasviðs, vonast til að óvissunni verði eytt á næstunni og segir að nóg pláss sé fyrir börnin á leikskólunum. „Það reyndar er þannig að börnum á leikskólum í borginni er að fækka. Þau eru að eldast og fara upp í grunnskólann. Það má segja að kreppubomban er komin úr leikskóla yfir í grunnskóla og ef maður lítur bara á húsrýmið þá er rúm fyrir fleiri. Það náttúrulega fylgir því að litlu börnin þau eru krefjandi í starfsmannahaldi. Þannig að við erum búin að vekja athygli á þessu og leggjum erindi til borgarráðs núna í næstu viku þar sem við förum svolítið yfir þessar tölur, “ segir Helgi Grímsson.