Gúmmítöffarar hrella Akureyringa með ískrandi hávaða að næturlagi

Myndband með reykspólandi ökuföntum á Akureyri gengur nú ljósum logum á Facebook. Það er tekið í nótt og sýnir sjö bíla sem aka hring eftir hring og láta væla í dekkjum sínum og er hávaðinn með miklum ósköpum. Myndbandið er tekið klukkan 01:26.

Sá sem póstar því, Svanberg Snorrason, er reiður og segir þetta það mesta sem hann hefur séð.

„Þarna eru 7 bílar í einu á hringtorginu, áhorfendur bæði á planinu við N1 og Tölvutek og svo á hringtorginu sjálfu. Einnig stoppa bílar umferðina af Glerárgötu inn á hringtorgið svo að þetta verði ekki truflað. Maður sá í dag að ákveðið hefði verið að hafa svæðið opið uppfrá en það virðist engu máli skipta. Á meðan að svona lagað er að raska ró og svefnfriði fólks, þetta er tekið upp klukkan 01:26, þá er ég á móti Bíladögum.“

Vísir ræddi við Börk Árnason lögregluvarðstjóra á Akureyri og spurði, hvað í ósköpunum er að gerast þarna?

„Þarna eru bílar að spóla. Bílar sem margra hestafla og menn eru að leika sér að því að spóla í hringi. Það er bara þannig.“

Þá höfum við það svart á hvítu. Börkur segir að erfitt sé við þetta að eiga því þeir strákar sem eiga í hlut fara á einn stað, leika sér þar og eru svo farnir. „Þeir láta sig hverfa. Þess vegna erum við ekkert endilega að ná þeim. En, við náðum mörgum sem voru að spóla. Það var góður slatti.“

Börkur tekur undir það að sperringur hafi verið í mönnum eftir Bíladagana sem voru haldnir nú um helgina. „Menn voru náttúrlega bar að leika sér og við reyndum okkar besta til að ná þeim. En, þeir voru að þessu að nóttu sem dag, trufla svefnfrið fólks, því miður. En svona er þetta bara. Við ráðum ekki við alla þessa bíla.“

Að öðru leyti, fyrir utan „spóllætin“ tókust Bíladagarnir mjög vel, Börkur segir að heilt yfir hafi verið rólegt og engin alvarleg mál komu upp. „Við erum bara mjög sáttir, ekkert alvarlegt gerðist. Fólk sem sækir þessa bíladaga, mjög almennilegir krakkar og gaman að spjalla við þau. Góð skemmtun. Við erum mjög sáttir við þessa helgi fyrir utan spóllætin.“