Bíða skýrslu um samninginn

Eigendur sjúkrahótelsins við Ármúla hafa sagt upp samningi við Sjúkratryggingar Íslands og segja ágreining uppi milli Landspítalans og fyrirtækisins. Sé hann það mikill um framkvæmd samningsins að ekki verði við unað.

Í þessari viku mun Ríkisendurskoðun birta skýrslu sem stofnunin hefur unnið að um framkvæmd samningsins sem nú hefur verið rift. Samkvæmt heimildum Fréttablaðsins eru í skýrslunni gerðar alvarlegar athugasemdir við framkvæmd samningsins. Heilsumiðstöðin hefur fengið að sjá drög að skýrslu Ríkisendurskoðunar og veit því líklegar hverjar niðurstöður skýrslunnar eru.

Í bréfi heilsumiðstöðvarinnar segir að annars vegar sé um að ræða skilgreiningu Sjúkratrygginga á starfsemi sjúkrahótels sem var lagt til grundvallar útboði sem Heilsumiðstöðin tók þátt í. Þar hafi átt að semja um hótelgistingu og fullt fæði fyrir einstaklinga sem séu færir um athafnir daglegs lífs en hafi hag af því að dvelja þar sem veitt er hjúkrunarþjónusta og tenging við það öryggi sem felst í að gista í nálægð við heilbrigðisþjónustu á höfuðborgarsvæðinu.