Byggir á lækkun skulda og betri fjárhag

orkumál Matsfyrirtækið Standard & Poor's hefur hækkað lánshæfiseinkunn Landsvirkjunar í BBB- úr BB+. Á það bæði við um langtímaskuldbindingar sem eru með og án ríkisábyrgðar. Hækkunin kemur í kjölfar hækkunar á lánshæfi ríkissjóðs um einn flokk í BBB+ úr BBB frá 15. janúar 2016. Horfur eru metnar stöðugar. Hörður Arnarson, forstjóri Landsvirkjunar, segir tíðindin góð fyrir fyrirtækið og staðfesti jákvæða þróun í rekstri sem byggir á bættum fjárhag og lækkun skulda. „Að komast í fjárfestingaflokk án ríkisábyrgðar eykur traust lánveitenda og styður við starfsemi Landsvirkjunar meðal annars með bættu aðgengi að lánsfjármagni og lægri fjármagnskostnaði. Við munum áfram leggja megináherslu á lækkun skulda og að styrkja rekstur fyrirtækisins enn frekar,“ segir Hörður.  – shá