Menntaskólinn í Reykjavík vann FG í úrslitum Gettu betur

Menntaskólinn í Reykjavík fór með sigur af hólmi í úrslitaviðureign Gettu betur sem fram fór í Háskólabíói í kvöld. MR vann Fjölbrautaskólann í Garðabæ með 41 stigi gegn 18 stigum.

Þetta er í nítjánda sinn sem MR sigrar keppnina. Atli Freyr Þorvaldsson, Jón Kristinn Einarsson og Kristín Káradóttir skipuðu lið MR en þau Helga Margrét Höskuldsdóttir, Tómas Geir Howser Harðarson og Jara Kjartansdóttir lið FG.

MR hafði betur gegn Menntaskólanum við Hamrahlíð í undanúrslitum, en FG sigraði Fjölbrautaskóla Vesturlands í sinni undanúrslitaviðureign.

Spurningahöfundar og dómarar keppninnar voru þau Margrét Erla Maack og Steinþór Helgi Arnsteinsson og spyrill Björn Bragi Arnarsson.