Guðjón Valur með þrjú mörk í naumum en mikilvægum sigri

Guðjón Valur Sigurðsson skoraði þrjú mörk fyrir Barcelona sem vann eins marks sigur á Vardar Skopje í Meistaradeild Evrópu í handbolta í kvöld, en leikið var í Barcelona.

Barcelona var sterkari aðilinn í fyrri hálfleik og leiddi 16-13. Í síðari hálfleik var spennan mikil og Barcelona vann að lokum eins marks sigur, 31-30.

Með sigrinum fer Barcelona á topp riðilsins, en þeir eru með ellefu stig eftir fyrstu sjö leikina. Vardar er í öðru sætinu með tíu stig og Pick-Szeged og Rhein-Neckar Löwen koma svo í humátt.

Wael Jallouz lék á alls oddi hjá Barcelona og skoraði tólf mörk, en næstur komur Raul Entrerrios með sex mörk. Guðjón Valur gerði eins og áður segir þrjú mörk. Sergei Gorbok gerði átta mörk fyrir gestina.