Lilja varð vitni að sögulegum viðburði í Bandaríkjunum

Sögulegur viðburður átti sér stað á dögunum, þegar veðhlaupahesturinn American Pharoah vann þrennuna í hinum svokölluðu Triple Crown-veðreiðum í Bandaríkjunum. Til þrennunnar teljast Kentucky Derby-veðreiðarnar, Preakness Stakes og Belmont Stakes sem fram fara í maí og júní en þetta er í fyrsta sinn síðan árið 1978 sem hestur vinnur þessa mögnuðu þrennu.

Fyrirsætan og sálfræðineminn Lilja Ingibjargardóttir var stödd á lokaveðreiðunum í Belmont og varð vitni að því þegar að American Pharoah komst á spjöld sögunnar. „Mér fannst þetta æðislegur dagur! Andrúmsloftið var rafmagnað, allir svo spenntir og miðar löngu uppseldir. Það var troðið af fólki, allir í sínu fínasta pússi, stelpurnar flestar með stóra og skemmtilega hatta (þ.ám. ég) og allir að vonast eftir að núna væri tíminn fyrir Triple Crown. Ég kynntist fullt af yndislegu og skemmtilegu fólki,“ segir Lilja spurðu út í upplifunina.

Þetta er jafnframt í fyrsta sinn sem Lilja fer á veðreiðar. „Mér var boðið og kynnt fyrir keppninni. Vinur minn sagði mer að ég mætti ekki missa af þessu, að þetta gæti orðið eitthvað sem kæmist í sögubækurnar og ég gæti sagt börnum og barnabörnum frá. Mér fannst þetta mjög spennandi og varð að fara og upplifa,“ segir Lilja alsæl.

Flestir vinir Lilju í New York höfðu ekki hugsað um annað en veðreiðarnar og hversu frábært þetta væri allt saman. „Það var lítið talað um annað en hversu frábært það væri ef American Pharoah myndi ná að vinna Triple Crown og auðvitað studdum við hann,“ bætir Lilja við.

Samskiptamiðillinn Snapchat var á staðnum, þannig að stöðugt var verið að birta snöpp af veðreiðunum og öllu því sem þeim fylgir og gat fólk því fylgst vel með. Var fólk ekki alveg í skýjunum þarna? „Fagnaðarlætin stóðu allavega í 20 mínútur og allir voru mjög hamingjusamir. Bill Clinton var einnig þarna og fólk var mjög spennt að hitta hann.“

Lilja er um þessar mundir í fríi í Bandaríkjunum og nýtur lífsins. „Núna er ég í fríi og mun ferðast til NYC, NJ, Arizona, Seattle og LA. Ég bý akkúrat núna á Íslandi og er í HR að klára sálfræðinám mitt,“ segir Lilja alsæl í Bandaríkjunum.