Samgöngustofa hafnar því að reistir verði byggingarkranar á Hlíðarenda

Samgöngustofa hefur hafnað beiðni ÞG-verktaka á Hlíðarendasvæðinu um að fá að setja upp byggingarkrana sem skaga myndu í aðflugsflöt að minnstu flugbraut Reykjavíkurflugvallar.

Deilurnar um byggingaframkvæmdirnar á Hlíðarenda virðast engan enda ætla að taka. ÞG verktakar sóttu um það til Samgöngustofu að fá að reisa tvo byggingarkrana á svæðinu en hún hafnaði þeirri beiðni á þriðjudag.

Nokkuð er síðan ÞG verktakar hófu jarðvegsvinnu á Hlíðarenda þar sem stendur til að reisa hverfi með um 600 íbúðum og alls kyns þjónustustarfsemi sem og stærsta hótel landsins.

Valsmenn hf, sem eiga byggingarlandið, vísa til samþykkts deiluskipulags svæðisins og samkomulag sem Hanna Birna Kristjánsdóttir, þáverandi innanríkisráðherra, og Jón Gnarr, þáverandi borgarstjóri, undirrituðu í Hörpu í október 2013. En þar stóð meðal annars að tilkynnt verði um lokun Norðaustur - Suðvestur flugbrautarinnar síðar á árinu 2013 að lokinni samþykkt deiluskipulags. Samtímis skuli endurskoða gildandi skipulagsreglur fyrir Reykjavíkurflugvöll. En síðan hefur ekkert gerst hvað þetta varðar hjá innanríkisráðuneytinu.

Aðeins er rúm vika síðan menn tóku fyrstu skóflustunguna að hótelinu sem stendur til að byggja á Hlíðarenda. Hinn 22. október sóttu ÞG verktakar síðan um að fá að reisa tvo byggingarkrana á svæðinu sem myndu skaga upp í aðflugsflöt að minnstu flugbrautinni.

Samgöngustofa svaraði erindi fyrirtækisins síðastliðinn þriðjudag að fenginni umsögn Ísavía sem sér um rekstur flugvallarins og vísar til áhrifa krananna á aðflugsflöt flugbrautarinnar og það sé niðurstaða Samgöngustofu að uppsetning á umræddum byggingarkrönum brjóti gegn gildandi ákvæðum reglugerðar um flugvelli og ekki sé heimilt að reisa krana né annað, t.d. byggingar, sem skagi upp í aðflugsflöt fyrir flugbraut 24 við Reykjavíkurflugvöll.

Þorvaldur Gíslason, forstjóri ÞG verktaka, sagði í samtali við fréttastofu í dag að þetta svar kæmi ekki í veg fyrir áframhaldandi jarðvegsvinnu á Hlíðarenda. Innan einhverra mánaða kæmi hins vegar að því að reisa þurfi byggingarkrana á svæðinu og síðan hefja byggingarframkvæmdir. En sumar bygginganna munu einnig verða hindrun fyrir aðflug. Þorvaldur segist vona að deiluaðilar leysi sín mál áður en komi að þeim tímapunkti.