Stærsta vika ársins í Street dansi á Íslandi

Stærsta vika ársins í dagatali Street dansara á Íslandi er nú í fullum gangi en vikan ber nafnið Street dans einvígið. Mikið er um að vera og koma hingað til lands tveir heimsþekktir dansarar, Kapela frá París sem hefur unnið allar stærstu street danskeppnir Evrópu og víðar og Danielle Polanco frá New York sem hefur unnið sem danshöfundur og einn aðaldansara Beyoncé í rúm tíu ár, auk þess að leika Missy í Step Up 2 og vinna með Janet Jackson, Jennifer Lopez, Lady Gaga, Usher og fleirum.

„Það mættu 70 manns í uppseldan House tíma hjá Kapela í mánudag, frábær stemmning og hann er nú þegar kominn í röð uppáhaldskennara en við höfum fengið fjölda stórra nafna til að kenna hjá okkur,“ segir Brynja Pétursdóttir skipuleggjandi hátíðarinnar.

Aðalkvöld hátíðarinnar er Einvígið sjálft sem verður haldið 6. nóvember í Spennistöðinni þar sem allir bestu street dansarar landsins keppa um bikarinn í 1 on 1 battles í hiphop, dancehall, waacking, popping og break.

„Þetta er í fjórða sinn sem hátíðin er haldin og er þetta i fyrsta sinn sem við flytjum inn tvo kennara, en áhuginn fyrir námskeiðunum er mikill svo ákveðið var að færa út kvíarnar og það er að fá mikil viðbrögð. Það er ómetanlegt fyrir dansara að fá að læra hjá svo stórum nöfnum í dansheiminum, en nemendur okkar eru enn að melta upplýsingar frá námskeiðum síðustu ára en Buddha Stretch, danshöfundur Michael Jacksons kom á fyrsta Einvígið til dæmis,“ segir Brynja. 

Nánar má lesa um einvígið hér.