Vinabönd sem aðstoða hvort annað

Hljómsveitin Lily of the Valley hefur myndað sterkt vinasamband við hljómsveitina Adore Repel sem er frá Leeds og ætla sveitirnar að nýta hvor aðra til góðs. „Við eigum sameiginlegan vin sem er Leedsari. Við kynntumst honum fyrir fjórum eða fimm árum. Síðan þá hef ég farið tvisvar út og hann hefur komið hingað nokkrum sinnum og er mikill tónlistarunnandi,“ segir Logi Marr, gítarleikari og söngvari hljómsveitarinnar Lily of the Valley, um upphaf vinskaparins.

Umræddi félaginn frá Leeds vildi ólmur kynna Loga og félaga fyrir félögum sínum í Adore Repel. „Þetta eru félagar hans sem eru í bandinu, alveg frábærir strákar, og við ákváðum að gera samning sem er þannig að við bókuðum tónleika fyrir þá á Íslandi og síðan ætla þeir að launa okkur greiðann og bóka handa okkur tónleika úti. Þetta er sniðugt fyrir meðalstór bönd myndi ég segja, því maður veit ekki alveg hvernig maður á að snúa sér við svona bókanir úti og svona,“ segir Logi alsæll með vinskapinn.

Lily of the Valley var stofnuð fyrir Airwaves-tónlistarhátíðina árið 2013 og hefur vaxið og dafnað talsvert síðan þá. „Við byrjuðum bara ég, Tinna og Mímir. Hrafnkell var búinn að vera mikið með okkur en svo bættum við slagverksleikara og bassaleikara við, þeim Guðmundi Þór og Leó Inga, þannig að við erum orðin massív,“ bætir Logi við hlær.

Sveitin hefur þó ekki enn farið út en stefnir á brottför innan skamms. „Við höfum ekki náð að fara út, við vorum samt eiginlega bókuð út í febrúar en sökum þess að við erum á fullu í að fjölga okkar, þurftum við að fresta útlandaferðum í smá tíma. Tinna varð til dæmis ólétt og svona,“ segir Logi, en bætir við að fjölgunin sé í raun nauðsynleg fyrir hljómsveitina. „Við erum að safna í rípleisment, ég er kominn með rípleisment, Tinna og einn annar í viðbót. Þá getum við líka lifað á erfingjunum,“ segir Logi og hlær dátt. 

Hljómsveitin gaf út sitt fyrsta smáskífulag af væntanlegri plötu þann 13. maí og ber lagið titilinn Wildflower. Lagið er þó ekki það eina sem kom út þann daginn. „Tinna átti barn sama dag þannig að þetta var mikill útgáfudagur.“

Vinaböndin ætla að koma fram á sameiginlegum tónleikum í kvöld á Gauknum klukkan 22.00 en þetta eru jafnframt fyrstu tónleikar Tinnu eftir barnsburð. 

„Við ætlum að byrja daginn í Te og kaffi í Austurstræti klukkan 14.00. Þar ætlum við að taka órafmagnað sett og róa taugarnar eftir Colour Run-ið. Í kvöld ætlum við svo að rokka, þá verður kassagítarinn eftir heima og rafmagnsgítarinn rifinn upp,“ segir Logi.