Hágrét eftir fréttirnar: „Hann hélt hreinlega að allir sem ég þekki væru dánir“

„Ég sat á fimmtán manna fundi þegar ég fékk póstinn frá skólanum að tilkynna mér að ég hefði komist inn og ég bara gjörsamlega brotnaði niður,“ segir Katrín Björgvinsdóttir, en hún er ein af sex einstaklingum sem fengu inngöngu í danska kvikmyndaskólann, Den Danske Filmskole, í Kaupmannahöfn.

„Ég byrjaði að skjálfa og hágrenja og öskraði svo á Baldvin leikstjóra sem ég er að vinna með. Hann fékk áfall og hélt hreinlega að allir sem ég þekki væru dánir. Ég tilkynnti honum svo á milli ekkasoga að ég hefði komist inn í skólann,“ segir Katrín og hlær. Hún segist ekki hafa verið búin undir fréttirnar og segir þetta hafa komið sér gríðarlega á óvart. „Eftir fréttirnar reyndi ég að einbeita mér í vinnunni og sat á fjögurra tíma fundi, enn í sjokki,“ segir Katrín.

Skólinn er einn fremsti kvikmyndaskóli á Norðurlöndunum og mun Katrín stunda nám í leikstjórn. „Það verður frábært að fara að einbeita sér að þessu. Þetta hefur verið mjög erfitt og dýrt ferli, enda hef ég farið fjórum sinnum út á þessu ári í viðtöl, námskeið og skrifleg próf,“ segir Katrín og hefur meðal annars tekið þátt í vikulöngu námskeiði á vegum skólans.

Hún hefur unnið við framleiðslu á ýmsum verkefnum frá árinu 2006 og skrifaði meðal annars handrit og framleiddi þættina Hæ Gosi. Hún segist þó spennt að færa sig yfir á listrænni braut. Katrín er að vinna hjá Saga Film að þriðju seríu af sakamálaþáttunum Rétti. Hún heldur síðan út í skólann í september, en námið er fjögur ár.

Den Danske Filmskole var stofnaður árið 1966 og býður upp á fjölbreyttar námsleiðir í tengslum við kvikmyndir, sjónvarp og gerð handrita. Aðeins 96 stunda nám við skólann og því ljóst að erfitt er að komast inn og umsóknarferlið er langt. Meðal nemenda sem útskrifast hafa úr skólanum er þekkti danski leikstjórinn Lars Von Trier.