Minni skuldir betri

Skuldamargfaldarar benda til þess að fyrirtæki landsins hafi verið of skuldsett árin 1997 til 2012, að því er fram kemur í erindi Steins Friðrikssonar, sérfræðings á fjármálastöðugleikasviði Seðlabanka Íslands, sem haldið var síðdegis í gær á málstofu um fjármagnsskipan og fjárhagslega stöðu 500 stærstu fyrirtækjanna á Íslandi.

Fyrir fjármálaáfallið 2008 er svigrúm fyrirtækja til að auka við skuldir sínar sagt hafa verið lítið. „Fjármálaáfallið hafði mikil áhrif á skuldastöðu fyrirtækjanna og fjölgaði verulega fyrirtækjum með neikvætt eigið fé,“ segir í samantekt Seðlabankans á niðurstöðum Steins. „Staða fyrirtækjanna batnaði mikið fyrstu fjögur árin á eftir og var orðin sögulega nokkuð góð árið 2012.“ Út frá sjónarmiðum um fjármálastöðugleika er þó ef til vill sagt æskilegra að skuldsetning fyrirtækjanna sé minni. Á tímabilinu hafi fjárhagsleg staða fyrirtækjanna líka verið mjög breytileg eftir atvinnugreinum.