Verkin tala

Sigurður Már Jónsson skrifar 5. janúar 2015 12:00

Markmið ríkisstjórnar Íslands er að tryggja hag heimilanna í landinu og efla atvinnulífið í þágu almennings. Allar ákvarðanir og aðgerðir ríkisstjórnarinnar taka mið af því markmiði. Á aðeins 19 mánuðum hefur margt áunnist og kúvending orðið í mörgum mikilvægum málaflokkum.

Tökum nokkur dæmi:

Fjárveitingar til Landspítalans eru hærri á árinu 2015 en nokkru sinni áður, eða 49,4 milljarðar króna.
Fjárveitingar til tækjakaupa á Landspítalanum hafa verið margfaldaðar og verða á þessu ári 1.445 milljónir. Það er sjöföld sú upphæð sem fór til tækjakaupa að meðaltali á árunum 2007 – 2012. Þá verður 945 milljónum króna varið á árinu í uppbyggingu nýs Landspítala.
Lyfjakostnaður einstaklinga lækkar með aukinni greiðsluþátttöku ríkisins og lækkun á virðisaukaskatti.
Frá 1. janúar eru tannlækningar þriggja ára barna og barna á aldrinum átta til sautján ára greiddar að fullu. Stefnt er að því að tannlækningar allra barna yngri en 18 ára verði greiddar að fullu af Sjúkratryggingum Íslands.
Fjárveitingar til félagsmála hafa aldrei verið hærri en á árinu 2015.
Barnabætur hækka um tæplega 16% á árinu 2015 sem nýtist tekjulægri fjölskyldum. Samanlagt munu útgjöld ríkissjóðs vegna greiðslu barnabóta hækka um 1,3 milljarða króna.
Tekjuviðmið vegna uppbótar á lífeyri hækka um 12,5% frá 1. janúar.
Fjárveitingar til Ríkisútvarpsins hækka á þessu ári um 300 milljónir frá því síðasta og verða 3,7 milljarðar króna.
40 milljörðum króna hefur verið skilað til heimilanna í formi lægri skatta á almenning.
Fjárlög skila nú afgangi, annað árið í röð, öfugt við halla áranna á undan.
Stuðningur við nýsköpun og vísindastarf hefur tekið stakkaskiptum og nemur 2,8 milljörðum króna á næstu tveimur árum.
Starfsemi á sviði menningararfs hefur stóreflst og fjöldi starfa skapast.
Störfum í landinu hefur fjölgað um 6.000 þúsund.
Leiðrétting verðtryggðra húsnæðislána er komin til framkvæmda og kemur þeim skuldurum best sem lægstar hafa tekjurnar

Fleira mætti nefna en dæmin sýna að ríkisstjórn Íslands lætur verkin tala. Hún vinnur í fullu samræmi við umboðið sem þjóðin veitti henni í alþingiskosningunum 2013 og forgangsraðar í takt við gefin loforð.