Vilhjálmur Bretaprins minntist móður sinnar í hjartnæmri ræðu

Vilhjálmur Bretaprins hreyfði við mörgum þegar hann flutti einlæga ræðu um móður sína Díönu prinsessu af Wales sem lést langt fyrir aldur fram í bílslysi í París árið 1997.

Ræðuna flutti Vilhjálmur, sem er annar í röðinni að bresku krúnunni, við kvöldverðarfagnað í Banquetting Hall í Lundúnum í tilefni þess að 21 ár er frá því að góðgerðasamtökin Child Bereavement voru stofnuð. Samtökin styðja foreldra sem hafa misst barn eða eiga dauðvona barn. Díana prinsessa hjálpaði til við að koma þessum samtökum á fót og er Vilhjálmur nú verndari þeirra.

Hann sagðist sjálfur hafa átt erfitt þegar hann missti móður sína fyrir átján árum. „Það sem móðir mín skyldi þá, og það sem ég skil núna, er að sorgin er ein sú sársaukafyllsta upplifun sem barn eða foreldri getur gengið í gegnum,“ sagði Vilhjálmur.

Stofnandi samtakanna, Julia Samuel, var ein af bestu vinkonum Díönu og er guðmóðir sonar Vilhjálms, Georgs prins.

„Fyrir tuttugu og einu ári var móðir mín viðstödd stofnun Child Bereavement-góðgerðasamtakanna. Fimmtán árum síðar var mér veittur sá heiður að gerast verndari þeirra og halda þannig áfram því góða starfi sem móðir mín sinnti. Hún var staðráðin í því að hjálpa þeim sem þurftu á því að halda og hún hefði verið afar stolt, líkt og ég, af öllu því sem samtökin hafa áorkað.“

Á meðal þeirra sem styðja samtökin er Gary Barlow úr hljómsveitinni Take That. Hann og eiginkona hans Dawn urðu fyrir miklu áfalli þegar dóttir þeirra Poppy fæddist andvana árið 2012.

„Okkur Dawn hefur ávallt þótt erfitt að ræða sorg okkar. Í stað þess mun ég syngja glaðværa tónlist til stuðnings samtakanna til að þakka fyrir alla þá hjálp sem þið hafið veitt okkur og öðrum fjölskyldum,“ sagði Barlow í gær.