Mörg veitingahús í Reykjavík eru með frábæra aðstöðu sem fá ekki nógu mörg tækifæri til að nýtast til útisetu. Þrátt fyrir að Austurvöllur og veitingastaðirnir þar í kring séu yfirleitt vinsælasti kosturinn þá hefur Reykjavík að geyma þó nokkrar perlur sem lesendur ættu að kanna betur á meðan sólin er hæst á lofti.
Vísir hafði samband við nokkra Íslendinga til þess að forvitnast um hvert væri best að fara á sólardögum. Vonandi fá lesendur betri hugmynd um hvert hægt er að fara, hvort sem fólk er í sumarfríi eða langar að kíkja í sólina eftir langan vinnudag.
Tónlistarmaður
„Ég verð reyndar í Danmörku um helgina, en þegar það er sól á Íslandi reyni ég alltaf að njóta þess á meðan hún er. Minn staður er auðvitað Prikið en þar fer maður oft í körfubolta í portinu."
Markaðsstjóri GoMobile
„Heyrðu ég er svo heppin að vera að vinna á Austurstræti með svalir yfir Austurvöll þannig að á sólríkum dögum í Reykjavík sit ég bara úti á svölum og vinn. En ef ég er ekki að fara í sund eða göngutúr með fjölskyldunni fer ég á staðina hjá Austurvelli, Uno eða efri hæðina á Lebowski."
Söngkona
„Ef að það er sól úti þá finnst mér alltaf best að vera úti í garðinum hjá mér. Ef ég fer hinsvegar niður í bæ þá finnst mér gott að sitja úti á Kexinu eða á Óðinstorgi."
Hárgreiðslumeistari
„Þegar veðrið er gott fer ég lang oftast á Jómfrúnna á Lækjartorgi og sit þar úti. Annars finnst mér líka gaman að fara á Kaffivagninn úti á Granda."
Flugfreyja og módel
„Í góðu veðri sest ég yfirleitt niður á Vegamótum, en pallurinn á Kex kemur líka sterkur inn."
Önnur dæmi um staði sem má hafa í huga ef að lesendum langar að sóla sig í miðbænum um helgina eru:
Loft Hostel, Iða Zimsen, Nora Magasin, Coocoo‘s Nest, Kjarvalsstaðir, Te og Kaffi í Eymundsson á Austurstræti, Cafe Babalú, Sjóminjasafnið, Reykjavík Roasters, Hressó og Cafe Sólon.
