Dóri DNA um Snapchat grínið: „Ég var bara að reyna að vera fyndinn“

„Fólk fer á netið og hneykslast og segir að það eigi að taka börnin mín af mér út af því að ég rétti þeim leikmuni og leikföng sem eru vopn. Ég lék mér með byssur þegar ég var barn og mig langar ekkert að skjóta neinn,“ sagði Dóri DNA í þættinum Loga á Stöð 2 í gærkvöldi.

Dóri hefur sætt mikilli gagnrýni eftir að hann birti myndir af sér rétta börnum sínum tveimur leikfangavopn á Snapchat-aðgangi Nova í vikunni. Fjarskiptafyrirtækið eyddi út myndunum og baðst afsökunar. Dóri segist hafa vaknað í atburðarrás úr eigin leikriti og vísar þannig til sýningu hans og Sögu Garðarsdóttur sem fjallar um það hvenær grín er fyndið og hvenær það fer yfir mörkin.

„Í leikritinu segir Saga Garðarsdóttir brandara og netið fer á hliðina, refsar henni fyrir það og krefst þess að hún biðjist afsökunar. Ég lenti nákvæmlega í þessu,“ segir hann. Fólk hafi gengið það langt að krefjast þess að börnin yrðu tekin af honum.

„Það voru blörraðar myndir af börnunum mínum á DV í gær eins og þau væru vanrækt eða vannærð, eða hluti af mansali eða eitthvað. Ég var bara að reyna að vera fyndinn,“ segir Dóri.

„Ef fólk hefði áhyggjur af  börnunum mínum af hverju fór það á Facebook og hneykslaðist? Þð sem fólk vill er fyrst og fremst að klappa sjálfu sér á öxlina og segja „ég hefði aldrei gert þetta því ég er svo hrein og tær“ það er það sem þetta snýst um. Á endanum verður þetta þannig að fólk fer á Facebook og skrifar: „Það er verið að drepa mann hérna á hliðina á mér. Aldrei myndi ég gera svona lagað.“

Innslagið úr þættinum má sjá hér fyrir ofan.