Samningafundur í dag gæti orðið viðburðaríkur

Framkvæmdastjóri Starfsgreinasambandsins segir Samtök atvinnulífsins ekki hafa komið til móts við kröfur sambandsins hingað til en boðað er til samningafundar hjá Ríkissátasemjara síðdegis. Forystumenn Starfsgreinasambandsins hafa sagt að það ráðist öðru hvoru meginn við páska hvort boðað verði til verkfallsaðgerða.

Mikið ber í milli hjá Starfsgreinasambandinu og Samtökum atvinnulífsins varðandi launamálin, en kröfur Starfsgreinasambandsins eru að lágmarkslaun verði orðin um 300 þúsund í lok samningstímans eftir þrjú ár. Samninganefndir mætast hjá Ríkissáttasemjara síðdegis en að auki hefur Starfsgreinasambandið boðað formenn allra þeirra 16 félaga sem standa að baki samninganefndinni til fundar til að undirstrika þungann í málinu.

Drífa Snædal framkvæmdastjóri Starfsgreinasambandsins er hæfilega bjartsýn á niðurstöðu fundarins seinna í dag.

„Allir fundir eru þannig að þeir draga línuna í sandinn. Við vitum ekki hvað gerist í dag. Við höfum ekki fengið þau viðbrögð frá Samtökum atvinnulífsins sem við höfum óskað eftir. Ekki fengið nógu skýr svör,“ segir Drífa.

Staðan verði því metin eftir samningafundinn í dag en auk þessa samningafundar sé verið að ræða við fulltrúa Samtaka atvinnulífsins um mál einstakra starfshópa í allan dag.

Forystumenn innan Starfsgreinasambandsins hafa áður lýst því yfir að niðurstaða í samningaviðræðum þurfi að liggja fyrir öðru hvoru megin við páska, annars verði sett í atkvæðagreiðslu meðal félagsmanna hvort boða skuli til verkfallsaðgerða.

„Það eiginlega stendur upp á Samtök atvinnulífsins. Þannig að ég veit það ekki en við erum að sjálfsögðu undirbúin undir ýmsar sviðsmyndir. En ákvörðun liggur ekki fyrir,“ segir Drífa.

En miðað við reynsluna, sýnist þér það langt í milli að mikið þurfi að gerast í dag til að þið farið á beinu brautina við samningaborðið?

„Það þarf að koma eitthvað frá Samtökum atvinnulífsins, já,“ svarar Drífa.

Hins vegar megi vinna hratt ef Samtök atvinnulífsins komi til móts við kröfur Starfsgreinasambandsins.

„Ef eitthvað fer að gerast þá náttúrlega gefum við okkur þann tíma sem til þarf, en til þess þarf eitthvað að fara að gerast,“ segir Drífa Snædal.