Kári Stefánsson dæmdur til að greiða túnþökuvinnslu

Héraðsdómur Reykjavíkur hefur dæmt Kára Stefánsson, forstjóra og stofnanda DeCode, til að greiða Torfi túnþökuvinnslu tæpar þrjár milljónir króna vegna verks sem fyrirtækið vann við hús Kára haustið 2012.

Samkvæmt því sem kemur fram í dómsorðum hélt Kári því fram að lækka bæri kröfur Torfs á hendur honum vegna þess að hann hefði þegar greitt sanngjarnt endurgjald fyrir vinnuna og að verkið hafi verið haldið verulegum göllum.

Héraðsdómur féllst þó á kröfu Torfs að hluta og dæmdi Kára til þess að greiða rúmlega 2,9 milljónir króna ásamt dráttarvöxtum fyrir verkið. Þá var hann einnig dæmdur til að greiða Torfi 1,1 milljón í málskostnað.

Bygging húss Kára Stefánssonar í Kópavogi hefur oft ratað í fjölmiðla á undanförnum árum vegna deilna hans við hina ýmsu verktaka sem hafa komið að henni. Verktakafyrirtækið Fonsi ehf. og rafverktakinn Elmax eru meðal þeirra sem hafa höfðað mál á hendur Kára fyrir dómstólum vegna þess að þeir töldu hann ekki hafa greitt fyllilega fyrir umsamin verk.