„Ég er kynferðisafbrotamaður“

„Ég er kynferðisafbrotamaður. Hvorki kærður né dæmdur en ég hef brotið gegn stúlku.“ Á þennan hátt hefst afsökunarbeiðni Ársæls Níelssonar sem hann birtir á Facebook síðu sinni. Færsluna má sjá í heild sinni hér fyrir neðan.

Atvikið átti sér stað í eftirpartý hjá félaga Ársæls þegar hann var átján ára en síðan eru liðin fjórtán ár. Undir lok skemmtunarinnar voru eftir í húsinu hann, húsráðandi og stúlka. Þau lögðust saman upp í rúm en eins og Ársæll orðar það „þá varð hann eitthvað spenntur“ og gerðist ágengur við hana. Á endanum leiddist honum áhugaleysi hennar, gafst upp og fór að sofa.

„Ég gerði mér ekki löngu síðar grein fyrir því sem í raun gerðist. Mótþróaleysi stúlkunnar stafaði ekki af áhuga heldur hræðslu. Ég hef séð eftir þessu alla tíð síðan og skammast mín. Það er fátt sem ég skammast mín fyrir og ekkert sem ég skammast mín fyrir eins mikið og þetta. Ég mun skammast mín og sjá eftir þessu svo lengi sem ég lifi,“ segir í færslunni.

„Ég hef aldrei hitt hana síðan,“ segir Ársæll í samtali við Vísi. „Ég ákvað loksins að biðjast fyrirgefningar. Stúlkur um allt land hafa skilað skömminni að undanförnu og ef þær eiga að geta skilað henni þá verðum við að geta tekið við henni.“

Færsluna má lesa hér fyrir neðan.

Ég er kynferðisafbrotamaður.Hef hvorki verið kærður né dæmdur. En ég hef brotið gegn stúlku. Þegar ég var 18 ára var...

Posted by Ársæll Níelsson on Thursday, 18 June 2015