Karabatic kominn til frönsku höfuðborgarinnar

Nikola Karabatic, einn besti handknattleiksmaður heims, er genginn í raðir PSG og þar með orðinn liðsfélagi línumannsins Róberts Gunnarssonar.

Karabatic, sem lék með Barcelona á síðustu leiktíð, var á dögunum sakfelldur fyrir sinn þátt í veðmálabraski og hagræðingu úrslita leiks í frönsku úrvalsdeildinni vorið 2012. Hann var þá leikmaður Montpellier. Karabatic var sektaður um 10 þúsund evrur en slapp við fangelsisdóm.

Hjá PSG hittir hann fyrir bróður sinn, Luka - sem einnig var sektaður í málinu, sem og Noka Serdarusic sem þjálfaði hann árum áður hjá Kiel.

Karabatic vann alls tólf titla hjá Barcelona á aðeins tveimur árum og kvaddi félagið sem Evrópumeistari.