Húfur til höfuðs einelti í Bolungarvík

Ragnheiður I. Ragnarsdóttir tók sig til og töfraði fram úr erminni sextán prjónaðar eineltishúfur á heilan fyrsta bekk í Grunnskólanum í Bolungarvík. Ragnheiður á son í bekknum.

„Þetta var nú ekki mikið mál, held það hafi tekið mig einn og hálfan mánuð að prjóna þessar,“ segir Ragnheiður, sem þó segist engin framleiðsluvél þegar kemur að prjónaskap.

Hún lét til skarar skríða og mundaði prjónana er hún hnaut um svipaðar húfur á norskri prjónasíðu og þar sagði að húfurnar hefðu fengið ágætis meðbyr þar í landi í baráttunni gegn einelti.

„Mér datt í hug að yfirfæra þær á íslensku og sex ára gamall sonur minn elskaði húfuna sem ég gerði fyrst, svo úr varð að ég bar hugmyndina undir umsjónarkennara bekkjarins. Hún tók svona líka vel í hana.“

Úr varð að kennarinn, Guðmunda Hreinsdóttir, fór af stað með heljarinnar verkefni tengt húfunum. „Það er ofsalega gaman að foreldrar skuli taka frumkvæðið í sínar hendur,“ útskýrir Guðmunda.

Guðmunda segir mikilvægt að byrja strax að innprenta börnunum að einelti líðist ekki og því frábært að fara af stað með þetta verkefni í fyrsta bekk.

Húfurnar eru svipaðar í grunninn en allar ólíkar. „Rétt eins og við öll, við erum einstök og það ber að muna,“ segir Guðmunda sem vonar að húfurnar verði áminning um ókomin ár, um að hafna einelti. Ragnheiður segist jafnframt hafa orðið vör við áhuga annarra skóla á þessari óvenjulegu leið. „Auðvitað væri það ekki nema frábært að koma kannski af stað trendi í þessu,“ en húfurnar eru vissulega ákveðin yfirlýsing þess sem ber hana.