Báðir aðilar gera tilkall til eigna í fyrrum húsnæði Caruso

Lögmaður feðganna Jóns Ragnarssonar og Valdimars Jónssonar sem eiga húsnæðið við Þingholtsstræti 1, þar sem veitingastaðurinn Caruso var áður til húsa, segir ekkert til í því að í húsnæðinu séu enn munir í persónulegri eigu eigenda Caruso sem nemi tugum milljóna króna.

Þrúður Sjöfn Sigurðardóttir, annar eigandi veitingastaðarins, sagðist í viðtali við Vísi í vikunni ekki hafa fengið að sækja persónulegar eigur sínar í húsnæðið frá því að þeim var meinaður aðgangur að því í desember. Ásamt tækjabúnaði séu í húsinu ýmis húsgögn sem þau hjónin komu jafnvel með að heiman. Að hennar sögn hleypur verðmæti hlutanna á tugum milljónum króna.

Telur alla lausamuni tilheyra leigusala

„Hið rétta er að samkvæmt leigusamningi eru lausamunir allir í eigu leigusala, sbr. 8. grein samningsins, eins og það var við upphaf leigutímans,“ skrifar Steinbergur Finnbogason, lögmaður leigusalanna, í bréfi til Vísis.

„Samningurinn talar að mínu viti skýru máli um hverskonar lausir munir fylgdu húsnæðinu þegar það var tekið á leigu og hvaða munir verða eftir í því að leigutíma loknum.“

Í greininni sem Steinbergur vísar til segir að í lok leigutíma verði allt lausafé eign leigusala „sem ekki er unnt að fjarlægja án þess að það sjái á hinu leigða húsnæði.“

Það sama eigi við um allt það lausafé sem nauðsynlegt er til að halda áfram veitingastarfsemi í húsinu.

Sjá einnig: Feðgarnir búnir að opna í gamla húsnæði Caruso: „Gengið vonum framar“

Í skriflegu svari við fyrirspurn Vísis segir Ómar Örn Bjarnþórsson, lögmaður eigenda Caruso, að munirnir sem Þrúður vísar til séu í eigu Marella ehf., einkahlutafélags í hennar eigu. Þeir séu því óviðkomandi leigusamningi þeirra José Garcia, manns hennar og meðeiganda, og Valdimars Jónssonar, annars eigenda húsnæðisins.

„Það er ekkert samningssamband á milli Þrúðar eða þess félags við leigusala þannig að hvernig þeir geta réttlætt að kasta eign sinni á þá hluti fær auðvitað ekki staðist ,“ skrifar Ómar.

„Auk þess getur venjulegur húsaleigusamningur ekki falið í sér afsal á óskilgreindu lausafé.“

„Allt þarna inni í þeirra eigu“

Líkt og greint var frá á sínum tíma, safnaðist starfsfólk Caruso saman fyrir utan veitingastaðinn nokkrum dögum eftir að Valdimar og Jón Ragnarsson, faðir hans, létu skipta um lása á húsinu og meina José og Þrúði aðgang. Þá höfðu starfsmenn meðal annars áhyggjur af persónulegum munum sínum sem læstir höfðu verið inni í húsinu.

Steinbergur segir eigendur staðarins hafa haft næg tækifæri til að gera skriflega grein fyrir meintum eigum sínum í húsinu en hafi aldrei gert það.

„Í tvígang hafa eigendur Caruso verið beðnir um að upplýsa um ósóttar eignir sínar í húsnæðinu svo að unnt yrði að afhenda þær tafarlaust,“ skrifar hann. „Þeim óskum hefur aldrei verið svarað.“

Ómar þvertekur fyrir þetta og segir þau hafa gert bæði húseigendum og lögreglu grein fyrir því hvaða muni þau ættu í húsinu, auk þess sem sundurliðun hafi verið send lögreglu.

„Í stuttu máli er allt þarna inni í þeirra eigu,“ skrifar hann.