Líkir umræðunni um Páleyju við galdrabrennu og vill afsökunarbeiðni

Páll Magnússon, sjónvarpsmaður og fyrrverandi útvarpsstjóri, hefur farið fram á að þeir sem höfðu sig hvað mest frami í umræðunni um Páleyju Borgþórsdóttur, lögreglustjóra í Vestmannaeyjum, biðji hana afsökunar. Þetta kemur fram í grein Páls sem birtist í Fréttablaðinu í dag en hún fjallar um umræðuna sem átti sér stað vegna tilmæla Páleyjar til viðbragðsaðila fyrir Þjóðhátíð í Vestmannaeyjum að þeir tjáðu sig ekki á fyrstu stigum málsins um meint kynferðisbrot.  Fer Páll sérstaklega fram á afsökunarbeiðni frá Guðrúnu Jónsdóttur, talskonu Stígamóta.

Eðlileg og rökrétt tilmæli

Páll, sem er frá Vestmannaeyjum, segir þessi tilmæli Páleyjar hafa verið eðlileg og rökrétt en tekur fram að þau hefðu vissulega getað verið betur orðuð.  „En þá ber reyndar að hafa í huga að þetta var minnisblað til viðbragðsaðila , sem einhver lak í fjölmiðla, en ekki fréttatilkynning. Nú tók við eitthvert sérkennilegasta sjónarspil sem ég hef orðið vitni að í opinberri umræðu – og hef ég þó marga fjöruna sopið í þeim efnum. Kannski mætti kalla þetta Íslandsmót álitsgjafa í útúrsnúningum 2015,“ spyr Páll.

„Allt í einu byrjaði einhver að garga: Þöggun! Þöggun! Álitsgjafarnir ærðust og löptu þessa orðaleppa upp hver eftir öðrum – greinilega margir hverjir án þess að hafa sjálfir lesið tilmæli lögreglustjórans. Í þeim er nefnilega ekki að finna snefil af tilburðum til þöggunar né tilmæli um slíkt. Aðeins vel rökstudd sjónarmið um tímasetningu á upplýsingagjöf með hagsmuni fórnarlambanna að leiðarljósi. Að kalla þetta þöggun er rökleysa og misnotkun á hugtakinu.“

Hissa á talskonu Stígamóta

Hann segir staðreyndir málsins ekki hafa hindrað alls konar fólk í að stökkva upp á „þennan útúrsnúninga- og fordæmingarvagn“ og óbrjálaðir menn hafi jafnvel haldið því fram í virðulegum útvarpsþætti að lögreglustjórinn væri sennilega að gæta einhverra vafasamra fjárhagslegra hagsmuna í Vestmannaeyjum með þessum tilmælum.

„Og alltaf varð ég meira og meira hissa á því hverjir tíndust upp á vagninn. Og mest hissa varð ég þegar talskona Stígamóta brást við útúrsnúningunum og ruglinu eins og um staðreyndir væri að ræða.“

Hann segir þetta hafa haldið áfram eftir að Þjóðhátíð var lokið þegar snúið var út úr orðum Páleyjar, að hans sögn, þegar hún sagði að ekki hefðu orðið alvarlegar líkamsárásir á hátíðinni.

„Þá var gargað: „Lögreglustjórinn í Vestmannaeyjum telur nauðgun ekki alvarlegar líkamsárás! (sic!). Og enn var talskona Stígamóta dregin á flot og lét sig hafa það að segja að ummæli lögreglustjórans, sem hann aldrei viðhafði, væru ekki svaraverð!“

Viðurstyggð á samfélagsmiðlum

Hann segir árásirnar á persónu lögreglustjórans hafa þyngst og endað í hreinni viðurstyggð í kommentakerfum og samfélagsmiðlum.

Hann segir þó vendingu hafa orðið á málinu þegar ung kona, hugrakkur þolandi tveggja nauðgana, steig fram og lýsti opinberlega heilshugar yfir stuðningi við þau sjónarmið sem fram komu í tilmælum lögreglustjórans. „Ætla álitsgjafarnir og talskona Stígamóta líka að saka þessa konu um tilburði til þöggunar – eða skilningsleysi á hlutskipti þolandans,“ spyr Páll.

Hann segist ekki kunna betri ráð til málsmetandi fólks sem kastaði olíu á þennan útúrsnúninga- og fordæmingareld, ekki síst talskonu Stígamóta, en að það taki sig til og biðji Páleyju afsökunar hver á sínum loga í þessari galdrabrennu.