Elínu Mettu vantar nú bara eitt mark í met Margrétar Láru

Elín Metta Jensen skoraði tvö mörk í 3-1 sigri 23 ára landsliðs kvenna á Póllandi í fyrrakvöld og vantar því bara eitt mark til að jafna markamet Margrétar Láru Viðarsdóttur yfir flest mörk fyrir yngri landslið Íslands.

Elín Metta hefur nú skorað 29 mörk í 35 leikjum fyrir 17 ára landsliðið (17 mörk í 14 leikjum), 19 ára landsliðið (9 mörk í 19 leikjum) og 23 ára landsliðið (3 mörk í 2 leikjum).

Margrét Lára Viðarsdóttir skoraði á sínum tíma 30 mörk í 43 leikjum fyrir 17 ára landsliðið (6 mörk í 15 leikjum), 19 ára landsliðið (13 mörk í 15 leikjum) og 21 árs landsliðið (11 mörk í 13 leikjum). Margrét Lára hefur síðan bætt við 71 marki fyrir íslenska A-landsliðið og það met er öllu öruggara en metið hennar í markaskorun fyrir yngri landsliðin.

Berglind Björg Þorvaldsdóttir er þriðja á listanum með 28 mörk í 28 leikjum fyrir yngri landsliðin og Greta Mjöll Samúelsdóttir skoraði á sínum tíma 20 mörk í 34 leikjum með yngri landsliðunum.

Elín Metta verður tvítug á þessu ári og hefur því enn tíma til að bæta við metið sitt en það er hins vegar óvíst hvort verða fleiri verkefni hjá 21 árs og 23 ára liðunum.