Jakob með sterkar taugar á vítalínunni og Borås vann

Jakob Örn Sigurðarson og félagar í Borås hafa byrjað tímabilið frábærlega í sænska körfuboltanum en liðið vann Norrköping Dolphins í kvöld eftir spennandi lokamínútur.

Borås missti niður tíu stiga forystu á lokasekúndunum en náði að landa tveggja stiga heimasigri, 91-89.

Jakob hitti ekki vel í leiknum en hann skoraði sex mikilvæg stig á síðustu 80 sekúndum leiksins sem vógu þungt þegar upp var staðið. Jakob endaði með 8 stig, 3 fráköst og 2 stolna bolta.

    

Borås Basket hefur unnið þrjá fyrstu leiki sína í deildinni og er annað af tveimur taplausum liðum sænsku úrvalsdeildarinnar en hitt taplausa liðið eru Svíþjóðarmeistarar síðustu þriggja ára úr Södertälje Kings.

Jakob var stigahæsti leikmaður Borås Basket í tveimur fyrstu leikjunum með 21,0 stig að meðaltali en hann fann sig ekki alveg nógu vel í kvöld. Jakob hitti úr 2 af 9 skotum en setti niður öll fjögur vítin sín sem komu öll á úrslitastundu leiksins.

Borås Basket var tíu stigum yfir fjórum mínútum fyrir leikslok en þá komu níu stig í röð hjá Norrköping Dolphins og munurinn var aðeins eitt stig, 82-81, þegar 95 sekúndur voru eftir.