Pentagon ætlar að greiða fórnarlömbunum í Kunduz bætur

Bandaríska varnarmálaráðuneytið hyggst greiða út skaðabætur vegna árásar Bandaríkjahers á sjúkrahús í Kunduz um síðustu helgi. Alls létust tuttugu og tveir og tugir særðust en ráðuneytið hefur lýst því yfir að árásin hafi verið mistök.

Ráðuneytið greindi frá því í kvöld að aðstandendur fórnarlambanna og þeir sem særðust fengju greiddar skaðabætur, en að það væri liður í að axla ábyrgð á voðaverkunum. Upphæð skaðabótanna hefur ekki verið ákveðin, en að sögn ráðuneytisins verður „viðeigandi greiðsla“ ákveðin í samráði við þá sem í hlut eiga.

Bandarískar hersveitir í Afganistan hafa beðist afsökunar á loftárásinni og segja að herinn myndi aldrei gera árás á sjúkrahús að yfirlögðu ráði. Alþjóðlegu hjálparsamtökin Læknar án landamæra krefjast stríðsglæparéttarhalda yfir yfirmönnum Bandaríkjahers vegna árásanna.