Segir nýtt einkunnakerfi grunnskólanna ranglátt

Nemandi í tíunda bekk telur nýtt einkunnakerfi, þar sem gefið er í bókstöfum í stað talna, vera ranglátt þar sem mikið misræmi sé í einkunnagjöf á milli skóla. Það muni líklega hafa áhrif á inntöku í framhaldsskóla næsta haust.

Embla Dröfn Óðinsdóttir, sem er í tíunda bekk Réttarholtsskóla, skrifaði um helgina grein í Fréttablaðið sem hún lýsir yfir áhyggjum vegna nýja einkunnakerfisins sem tekið var upp í haust. 

„Ég var búin að kynna mér þetta einkunnakerfi rosalega vel og þetta var bara byrjað að pirra mig rosalega mikið, þessir litlu gallar sem höfðu samt svo mikil áhrif. Svo ég hafði samband við vinkonur mínar í öðrum skólum og fór inn á heimasíður grunnskólanna. Margir grunnskólar eru með námsmatið inni á heimasíðunni svo ég fór að skoða þetta. Þetta er rosalega mismunandi. Sumir eru með prósentukvarða, sumir með stig og sumir með tölur. Svo mér finnst bara virkilega ósanngjarnt hvað það er mikill munur á milli skóla. Þetta mun hafa mikil áhrif á hvernig krökkum mun ganga í lok ársins,“ segir Embla.  

Hún telur að kerfið geti orðið gott en að innleiðing þess hafi ekki verið nógu vönduð.

„Ég er með mjög miklar áhyggjur af þessu. Ég bara vorkenni menntaskólunum að þurfa að fara í gegnum þetta allt því að þeir vita ekkert hvernig einkunnirnar eru byggðar upp. Allir skólarnir eru með mismunandi einkunnir og það er í rauninni ekkert hægt að dæma krakkana alla eins. Þetta kerfi er alveg mjög flott en það er bara þessi samræming sem er ekki að ganga“ segir hún.  

En hvað myndi hún vilja sjá gert í málinu?

„Ég held bara að það þurfi að vera eftirlit sem fylgist með þessu. Það þarf að kíkja á alla skólana, þó svo að það sé mjög tímafrekt þá bara þarf að gera það. Það þarf bara að passa að það séu allir skólarnir að skilja kerfið rétt, að það séu réttar leiðbeiningar og að skólarnir séu að fara eftir fyrirmælum,“ segir Embla.