Flugskóli Íslands: Tilgangur flugsins var þjálfun annars flugkennarans

Mennirnir tveir sem fórust í flugslysi suður af Hafnarfirði í gær voru báðir reynslumiklir flugmenn og flugkennarar. Þetta kemur fram í tilkynningu frá Flugskóla Íslands en þar kemur fram að tilgangur flugsins var þjálfun annars flugkennarans í tegund þessarar flugvélar, sem var ein af kennsluflugvélum Flugskólans.

Samkvæmt flugáætlun var áætlaður brottfarartími vélarinnar kl. 13:45. Hún fór í loftið um kl. 14 og áætlað var að lenda aftur á Reykjavíkurflugvelli upp úr kl. 14:30.

Flugskólinn segir flugmennina hafa verið í samskiptum við flugumferðarstjórn í Reykjavík. Byrjuðu þeir á að taka nokkrar snertilendingar á Reykjavíkurflugvelli og fóru svo á hefðbundið æfingasvæði suður af Hafnarfirði.

Neyðarsendir fer svo í gang og þá hóf flugumferðarstjórn í Reykjavík strax að reyna að ná sambandi við vélina. Þegar ekkert svar berst frá flugvélinni var björgunarlið kallað út.

Flugskóla Íslands var tilkynnt um óvissuástand af flugumferðarstjórn og að ekki næðist samband við flugvélina. Í kjölfar þess var viðbragðsáætlun skólans vegna flugslysa virkjuð.

Flugvélin var ein af fimm samskonar vélum sem Flugskólinn rekur. Ein þeirra hefur verið í rekstri hjá skólanum frá því í febrúar 2014, tvær voru teknar í notkun í ágúst síðastliðnum og tvær nú í nóvember. Vélin sem brotlenti var önnur þeirra. Þessi tegund flugvéla hefur verið í notkun frá árinu 2004 og eru þær í rekstri víða um heim.

Flugskólinn vinnur nú með lögreglu og Rannsóknarnefnd samgönguslysa að því að upplýsa um orsakir slyssins.

Er hugur allra er hjá aðstandendum flugmannanna, að því er fram kemur í tilkynningunni en öllu skólastarfi Tækniskólans hefur verið aflýst í dag. Öll flugkennsla á vegum Flugskóla Íslands fellur auk þess niður fram yfir helgi af virðingu við hina látnu og aðstandendur þeirra.

Þá hefur Flugskólinn kallað starfsmenn og nemendur skólans saman í samstarfi við Rauða kross Íslands síðar í dag. Þar verður þeim veittur stuðningur og upplýsingar. Enn fremur hefur skólinn boðað til opinnar samverustundar í Vídalínskirkju í Garðabæ sunnudaginn 15. nóvember kl. 17.

Upplýsingar um vélina:

Tegund: Tecnam P2002JF

Gerð: 2 sæta

Einkennisstafir: TF-IFC

Skráningarnúmer: 1126

Árgerð: 2015

Raðnúmer: 265

Tekin í notkun: 6.11.2015

Tegund hreyfils: ROTAX 912 S2

Síðasta skoðun: Tekin inn ný í nóvember 2015

Heildarflugtími flugvélar: 16,2 tímar

Eigandi: Flugtak ehf.

Umráðandi og rekstraraðili: Flugskóli Íslands ehf.