Íslendingaliðin með sigra

Íslendingaliðin Sönderjyske og Aalborg unnu bæði leiki sína í dönsku úrvalsdeildinni í handbolta í dag en ekkert íslenskt mark leit dagsins ljós.

Daníel Freyr Andrésson, Árni Steinn Steinþórsson og félagar í Sönderjyske unnu 4 marka sigur á botnliði Skive á heimavelli í dag.

Liðin fóru jöfn inn í hálfleikinn en góður seinni hálfleikur gerði útslagið fyrir Sönderjyske sem skaust upp í 8. sætið með sigrinum.

Þá unnu Aron Rafn Eðvarsson og félagar í Aalborg mikilvægan sigur á GOG á útivelli í dag en Ólafur Gústafsson, leikmaður Aalborg, er enn frá vegna meiðsla.

Með sigrinum skaust Aalborg upp í efsta sætið að sjö leikjum loknum en eftir að hafa verið marki undir í hálfleik tókst leikmönnum Aalborg að snúa taflinu við í seinni hálfleik.