Fer Guðjón Valur aftur til Löwen?

Landsliðsmaðurinn Guðjón Valur Sigurðsson er mögulega á leið aftur til Þýskalands ef marka má frétt vefmiðilsins handball-planet.com.

Í síðasta mánuði var greint frá því að Valero Rivera væri á leið til Barcelona í sumar en þá rennur samningur Guðjóns Vals við félagið út.

Sjá einnig: Guðjón Valur fær samkeppni hjá Barcelona

Löwen mun missa Uwe Gensheimer til PSG í sumar en félagið reyndi þá að klófesta Raul Santos frá Gummersbach. Austurríkismaðurinn valdi fremur að ganga til liðs við Kiel, sem missir Dominik Klein til Nantes.

Rivera er einmitt nú á mála hjá Nantes en þessi öflugi spænski landsliðsmaður snýr aftur til síns heimalands að tímabilinu loknu.

Guðjón Valur lék í tólf ár í Þýskalandi og eitt í Danmörku áður en hann gekk í raðir Barcelona í fyrra. Hann var á mála hjá Löwen frá 2008 til 2011.

Ekki náðist í Guðjón Val við vinnslu fréttarinnar.