Lögregluþjónninn Birgir Örn Guðjónsson, sem einnig er þekktur sem Biggi lögga, segist aldrei fengið jafn mikil viðbrögð við pistli og við þeim sem hann birti um helgina og fjallaði um umdeildan sýknudóm yfir fimm ungum mönnum sem ákærðir voru fyrir hópnauðgun. Sveinn Andri Sveinsson, lögmaður eins hinna sýknuðu, sagði lögreglumanninn brjóta gegn grundvallarreglum með því að tjá sig um málið á þennan hátt og kallar eftir því að Birgir verði rekinn, eða settur í gangbrautarvörslu.

Sorglegt ef kastljósið beinist að sér

„Mér finnst þetta kannski fyrst og fremst bara svolítið sorglegt,“ segir Birgir í samtali við útvarpsþáttinn Reykjavík síðdegis á Bylgjunni í dag. „Auðvitað var það ekki tilgangur minn að valda angist neins.“

Fréttavefur Hringbrautar greindi frá því fyrr í dag að formlegt erindi frá Sveini Andra hefði borist lögreglu og að það væri til skoðunar hjá embættinu. Birgir sagði meðal annars í Facebook-pistli sínum, sem vakti mjög mikla athygli, að þó réttarkerfið hafi ekki náð utan um brot ungu mannanna gerði samfélagið það. Mönnunum var gefið að sök að hafa haft margs konar kynferðismök við sextán ára stúlku, meðal annars með því að beita hana ofbeldi.

Til ungu mannanna sem voru kærðir fyrir að nauðga 16 ára stúlku í Asparfelli; Þó svo að réttarkerfið nái ekki utan um...

Posted by Birgir Örn Guðjónsson on 21. nóvember 2015

Birgir bendir á að hann hafi skrifað um málið á sína persónulegu Facebook-síðu, ekki síðuna sem heldur úti undir heitinu „Biggi lögga“ þar sem hann tjáir sig um ýmis mál tengd lögreglustarfinu. Hann segist þó átta sig á því að fólk geri almennt ekki mikinn greinarmun á því hvort hann tjái sig sem Birgir Örn eða Biggi lögga hverju sinni.

„Þessi orð voru bara fyrst og fremst orð föður, börnin mín eru náttúrulega það dýrmætasta sem ég á og þetta umhverfi skelfir mig pínu og þess vegna skrifa ég þessi orð,“ segir hann. „Mér finnst það líka frekar sorglegt ef kastljósið verður á því sem er að gerast á milli okkar (Sveins Andra), sem það á alls ekki að vera.“

Lögreglumenn alltaf hlutlausir þegar þeir vinna að málum

Hann segir það mjög eðlilegt að ræða það hvort honum beri að tjá sig um lögreglumál, verandi starfandi lögreglumaður.

„En ég held að það megi ekki gera það lítið úr lögreglumönnum að segja að þeir geti ekki verið faglegir þó þeir hafi skoðanir,“ segir hann. „Við erum bara menn og við höfum skoðanir á hlutum sem gerast en við erum að sjálfsögðu alltaf hlutlausir þegar við vinnum að málunum. Það kallast bara fagmennska. Líkt og lögfræðingar sem eru að verja menn og vita oft alveg hvað þeir hafa gert en verja þá engu að síður og eru að sjálfsögðu fagmenn.“

Mikil reiði braust út á samfélagsmiðlum í kjölfar sýknudómsins og hafa margir lagt orð í belg um málið. Birgir segist alla gera sér grein fyrir hversu erfið mál af þessu tagi séu og leggur til að skoða löggjöf í Noregi sem leyfi refsingu fyrir gáleysi í kynferðisbrotamálum.

„Kannski ætlaði enginn sér neitt slæmt, en menn ættu að vita að það er ekki í lagi að nokkrir aðilar skiptist á að sofa hjá sextán ára drukkinni stelpu,“ segir hann. „Menn ættu að vita að það er ekki eðlilegt að unglingsstúlkur þurfi að taka þátt í einhvers konar kynferðislegum athöfnum til að komast inn í partí. Þetta eru svona hlutir sem menn eiga að geta sagt sér.“ 

Hlýða má á viðtalið í Reykjavík síðdegis í heild sinni í spilaranum hér að ofan.