Janette Beckman á leið til landsins: Hef alltaf verið hrifin af menningu uppreisnarinnar

„Bæði pönkið og hiphop-menningin komu frá götunni. Þetta var menning hinna ungu. Þetta var tónlist sem gaf hinum raddlausu rödd,“ segir ljósmyndarinn Janette Beckman, sem er á leið til landsins. Beckman kemur hingað til lands til þess að halda sýningu ásamt goðsögn í graff-heiminum, Cey Adams. Adams gengdi mikilvægu hlutverki hjá Def Jam Records, sem hefur í gegnum tíðina verið með margar af merkilegustu rappstjörnum heims á samning. Beckman tók myndir af goðsögnum á borð við LL Cool J, Bustah Rhymes, Run DMC, Beastie Boys og Salt N‘ Pepa. Því má segja að þarna séu tvær manneskjur sem hafi haft áhrif á sögu rapps í heiminum, sem ætla að sameina krafta sína með sýningu í Reykjavík.

Kemur frá London

Beckman kemur frá London og hóf ljómsyndaraferilinn þar. Hún vakti strax athygli og tók myndir fyrir mörg þekkt tímarit í heimalandinu. Í upphafi níunda áratugarins fluttist hún til New York, og við það stækkaði kúnnahópurinn talsvert. Myndir eftir Beckman hafa birst í Rolling Stone, Glamour, The Times, Newsweek, Esquire og svona mætti lengi telja. En hennar þekktustu verk eru líklega myndir sem hún tók af tónlistarfólki. Myndir eftir hana hafa ratað á plötuumslög þekktra hljómsveita og listamanna á borð við The Police, Salt-n-pepa og Run DMC.

Magnaðir tímar

Í samtali við Fréttablaðið segir Beckman frá því að tímarnir sem hún var á fullu að mynda í rappsenunni hafi verið magnaðir. „Ég finn að fólk leitar enn í þessa tíma og hefur enn mikinn áhuga á þessum myndum.“ Sýningar Beckman hafa vakið mikla athygli og verið settar upp í New York, Los Angeles, París, London og fleiri stórborgum. Ein af sýningum hennar var til dæmis Archive of Attitude, en myndirnar í henni voru margar af meðlimum gengisins Hoyo Maravilla, frá austurhluta Los Angeles. „Fyrir sýninguna komst ég aftur í samband við suma af meðlimum gengisins. Það var ótrúlegt að rifja upp hluti sem gerðust fyrir um 30 árum síðan. Flestir sem ég hafði tekið myndir af voru annað hvort dánir eða á bakvið lás og slá. En þrjár kvennana sem ég ræddi við lifðu þessa baráttu af og mér þykir afar vænt um þær.“

Breyttir tímar

Beckman segist enn fylgjast með rappinu í dag. „Mér líkar við nokkra rappara, held mest upp á Drake. En í sannleika sagt finnst mér rappararnir af „gamla skólanum“ betri en þeir sem eru í dag. Rapparar níunda og tíunda áratugarins.“ Hún segir að sér finnist senan hafa breyst talsvert. „Ég hreyfst af pönkinu og rappinu því þar var fólk sem elskaði tónlistina sína og menningu meira en viðskiptahliðina. Peningarnir hafa breytt þessu öllu. Áður fyrr voru allir miklu frjálsari einhvernveginn.“

Hlakkar til að koma

„Ég kem því vinur minn Smutty Smiff bað mig að koma hingað og setja sýninguna upp,“ segir hún. Smutty er útvarpsmaður á X-inu og á viðburðarfyrirtækið Wildcat. „Ofboðslega margir sem ég þekki hérna í Bandaríkjunum hafa sagt mér frá fegurð Íslands, þannig að ég get eiginlega ekki beðið að koma.“ Beckman mun hafa í nógu að snúast þegar hún kemur. Hún heldur sýningu í Gallerí Fold ásamt Cey Adams, þar sem nokkrir færir listamenn úr graffsenunni munu mála eftirlíkingar af myndum Beckman. Hún verður einnig með ljósmyndanámskeið hjá Ljósmyndaskólanum og heldur fyrirlestra.