Þrestir hlaut Silver Hugo verðlaunin

Kvikmyndin Þrestir hlaut Silver Hugo verðlaunin í keppni nýrra leikstjóra á Chicago International Film Festival í nótt. Hátíðin er elsta og ein virtasta kvikmyndahátíð í Bandaríkjunum.

Rúnar gat því miður ekki verið viðstaddur á verðlaunaafhendingunni en hann er að halda upp á afmæli dóttur sinnar, Esju, hérna heima á Íslandi.

Silver Hugo eru þriðju stóru verðlaunin sem Þrestir hlýtur á stuttum tíma en um síðustu helgi tók Rúnar á móti aðalverðlaununum á kvikmyndahátíðinni í Varsjá í Póllandi. Fyrr í haust fengu Þrestir aðalverðlaunin á kvikmyndahátíðinni í San Sebastian á Spáni eins og alkunna er.

Þrestir var frumsýnd hér á landi þegar kvikmyndahátíðin RIFF stóð sem hæst. Atli Fjalar Óskarsson, Ingvar E. Sigurðsson og Rakel Björk Björnsdóttir fara með aðalhlutverk myndarinnar.

Þrestir er önnur kvikmynd Rúnars í fullri lengd, sú fyrsta var Eldfjall sem var heimsfrumsýnd á Director's Fortnight-hluta Cannes-hátíðarinnar árið 2011.



„Þetta er mikill heiður og frábært að hafa fengið þessi verðlaun á frumsýningunni okkar í Ameríku” segir Lilja Snorradóttir hjá Pegasus, einn af framleiðendum Þrasta í tilkynningu.

Þar segir Rúnar leikstjóri myndarinnar einnig að það sé mjög gott þegar mikill áhugi er á myndinni alls staðar frá í heiminum. „Ég er fyrst og fremst stoltur af samverkafólki mínu sem hefur vaðið eld og brennistein til að  gera  ÞRESTIR  mögulega. Það er frábært hvað uppskeran er þegar orðin góð hjá okkur.”