Tilfinningaþrungin ræða Einars á málþingi Geðhjálpar: „Það eina sem við megum ekki gera er að stoppa“

„Það sem ég held að sé það erfiðasta fyrir móður mína og margt annað fólk sem glímir við alvarlega  geðsjúkdóma er að oftar en ekki kemur það upp illindum á milli sín og annarra sem eru nánir þeim og oft verður það til þess að þau verða dálítið ein á báti. Eins og með móður mína þá get ég sagt með nokkurri vissu að utan fagfólks á geðsviði erum við kærastan mín eina fólkið sem getur talist í reglulegum samskiptum við hana. Það eru nokkrir úr fjölskyldunni og nokkrar gamlar vinkonur sem hún heyrir í við og við en verður seint hægt að kalla það reglulegt.“

Þetta sagði Einar Zeppelin Hildarson í ræðu sem hann hélt á málþingi Geðhjálpar, Öðruvísi líf, fyrr í þessum mánuði. Á málþinginu var áhersla lögð á upplifun og reynslu aðstandenda geðsjúkra en móðir Einars hefur um árabil glímt við alvarlegan geðsjúkdóm.

Einar ræddi um reynslu sína í viðtali við Fréttablaðið í sumar en mörgum er eflaust í fersku minni þegar móðir Einars myrti litlu systur hans og reyndi að drepa hann á heimili þeirra við Hagamel í júní 2004.

Sjá einnig: Mamma reyndi að drepa mig

Einar komst við illan leik til nágranna sinna sem kölluðu á lögreglu en systir Einars, Guðný Hödd, var látin þegar lögregla kom á vettvang. Móðir Einars var úrskurðuð ósakhæf þegar dómur var kveðinn upp í málinu í maí 2005 og gert að sæta öryggisgæslu á Sogni.

Ræðu Einars frá málþingi Geðhjálpar má sjá í heild sinni í myndbandinu hér að neðan en þar ræðir hann á einlægan hátt meðal annars um veikindi móður sinnar og samband sitt við hana, atburðinn á Hagamel 2004 og líf sitt í kjölfar hans en hann leiddist út í neyslu fíkniefna og talaði ekki við móður sína í rúm tvö ár.

„Ég vildi óska þess að ég ætti einhverja töfralausn sem ég gæti deilt með ykkur til að hjálpa ykkur í gegnum erfiðu kaflana í lífinu en svo er því miður ekki. En það eru þó þrjár setningar sem ég vil biðja ykkur um að muna sem hafa hjálpað mér í gegnum ótalmargt: Það er alltaf von, lífið er það dýrmætasta sem við eigum og það eina sem við megum ekki gera er að stoppa.“