Innlent

Útvarp Saga í mál við netverja

Jakob Bjarnar skrifar
Arnþrúður ætlar ekki að sitja lengur undir geipi netverja og hefur fengið harðsnúinn lögmann til að vakta internetið og horfa eftir hugsanlegum meiðyrðum í sinn garð og sinna.
Arnþrúður ætlar ekki að sitja lengur undir geipi netverja og hefur fengið harðsnúinn lögmann til að vakta internetið og horfa eftir hugsanlegum meiðyrðum í sinn garð og sinna.
Sævar Þór Jónsson lögmaður greinir frá því í pistli á Eyjunni að hann vakti nú internetið og skoði sérstaklega ummæli sem fallið hafa um Útvarp Sögu og þá sem að þeirri útvarpsstöð standa. Sævar Þór hefur gert þetta með það fyrir augum að sækja þá til saka sem gerst hafa sekir við brot á hegningarlögum með því þá að hafa látið ærumeiðandi ummæli falla.

Sama hversu grjótharðir menn eru við lyklaborðið, þeir ættu að hugsa sig um tvisvar vilji þeir víkja ókvæðisorðum að Útvarpi S0gu, því Sævar Þór gæti verið á vaktinni.
„Stjórnendur útvarpsstöðvarinnar Útvarps Sögu hafa falið mér að sækja þá til ábyrgðar sem harðast hafa gengið fram gegn persónum þeirra með óvægnum og ómálefnalegum hætti. Það á ekki að líðast í lýðræðisríki að fólk þurfi að sitja undir persónulegum árásum á opinberum vettvangi eins og internetinu og þurfa að þola særandi og ærumeiðandi ummæli ítrekað,“ segir lögmaðurinn í pistlinum. 



„Það er partur af eðlilegum samskiptum að hver og einn íhugi framgöngu sína og hvaða áhrif orð geta haft á fólk þegar talað er um persónu þess og ekki síst hvaða áhrif það getur haft á fjölskyldur þeirra og aðstandendur. Skiptir engu hvort um opinbera persónu sé að ræða eða ekki, aðgát skal höfð í nærveru sálar,“ segir Sævar Þór í pistli sínum.



Ekki tókst að ná tali af lögmanninum, þrátt fyrir ítrekaðar tilraunir og þá inna hann eftir því hvort hann væri kominn með marga á skrá sem mega búast við því að hann sæki til saka. En, þeir sem eru grjótharðir á bak við lyklaborðið og vilja tjá sig með ofsafengnum hætti um Útvarp Sögu, Arnþrúði Karlsdóttur útvarpsstjóra og helstu stjörnu stöðvarinnar, Pétur Gunnlaugsson, ættu að hugsa sig um tvisvar, því Sævar Þór gæti verið á vaktinni.

Tengd skjöl




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.