Fimm handteknir vegna nauðgana á stúlkubörnum í Delí

Fimm menn hafa verið handteknir í tengslum við nauðganir á stúlkubörnum í Nýju-Delí á Indlandi. Tveir menn voru handteknir vegna nauðgunar á tveggja og hálfs árs gamalli stúlku og þrír fyrir hópnauðgun á fimm ára stúlku.

Tveir 17 ára drengir voru handteknir fyrir nauðgunina á yngri stelpunni. Lögreglan yfirheyrði íbúa á svæðinu þar sem nauðgunin átti sér stað og beindust sjónir fljótt að drengjunum tveimur. Stúlkunni var rænt af heimili sínu af tveimur mönnum en var skilað aftur í gær með áverka og blæðandi sár á líkama sínum.

Þrír menn hafa jafnframt verið handteknir í tengslum við rannsókn á hópnauðgun á fimm ára gamalli stúlku í Delí. Lögreglan segir að hún hafi verið lokkuð í hús nágranna síns áður en henni var nauðgað. Stúlkurnar eru báðar á batavegi.

Nýja-Delí hefur verið uppnefnd „nauðganahöfuðborg Indlands“ en þetta eru ekki fyrstu fregnirnar af hrottafengnum nauðgunum sem berast þaðan. Árið 2014 voru rúmlega 2000 nauðganir tilkynntar til lögregluyfirvalda.