Stúlka kærir fimm fyrir hópnauðgun

Þrjú kynferðisbrot eru nú til rannsóknar hjá lögreglunni á Eskifirði, þar á meðal ein hópnauðgun. Sautján ára stúlka kærði í byrjun mánaðarins fimm karlmenn, á milli tvítugs og þrítugs, fyrir nauðgun sem átti sér stað á Austurlandi í lok júní. Yfirlögregluþjónninn á Eskifirði staðfesti þetta í samtali við Fréttablaðið í gær en vildi ekki gefa upp hvar brotið hefði verið framið.

Í lok júlí kærði kona fyrrverandi sambýlismann sinn fyrir brot gegn dóttur hennar. Brotin áttu sér stað á Austurlandi á árunum 2007-2011 þegar stúlkan var á unglingsaldri. Maðurinn býr enn á Austurlandi. Það mál er lengst komið í rannsókn af málunum þremur og verður væntanlega sent ákæruvaldinu innan skamms.

Þá er einnig nauðgun sem átti sér stað á Norðurlandi til rannsóknar hjá lögreglunni á Eskifirði.

„Við höfum því miður fengið að jafnaði níu kynferðisbrotamál inn á borð til okkar á hverju ári síðustu fimm ár eða svo,“ segir Jónas Wilhelmsson yfirlögregluþjónn á Eskifirði. „Rannsókn á þessum málum gengur mjög vel.“

Ráðist inn á heimili lögreglumanns

Mikill erill hefur verið hjá lögreglunni á Austurlandi vegna manneklu í sumar og ekki hefur verið hægt að ráða í allar afleysingastöður vegna fjárskorts. Sömu sögu er að segja af embætti lögreglunnar á Seyðisfirði.

Í fyrrakvöld réðst karlmaður inn á heimili eina lögreglumannsins sem var á vakt þar og hótaði fjölskyldu hans lífláti. Lögreglumaðurinn var ekki heima þegar innrásin átti sér stað. Hann var sem fyrr segir á vakt í umdæminu, sem nær frá Vopnafirði í norðri til Seyðisfjarðar í suðri.