Öllu því besta er tjaldað til

Átakið Geðveik jól hóf göngu sína árið 2011 og hefur frá upphafi sett skemmtilegan svip á jólaundirbúning landsmanna. Þar keppa fyrirtæki sín á milli um „geðveikasta jólalagið“ sem ýmist er samið af starfsmönnum sjálfum eða saminn er nýr texti við eldra útgefið lag. Um leið er markmið átkasins að næra geðheilsu starfsmanna, hressa upp á móralinn og að leyfa starfsmönnum að láta ljós sitt skína um leið og þeir láta gott af sér leiða.

Upphafsmaður Geðveikra jóla er Bjarney Lúðvíksdóttir sem jafnframt hefur stýrt verkefninu frá upphafi. Þá sat hún í stjórn Geðhjálpar og segist hafa viljað finna nýja og skemmtilega leið til þess að styðja við félagið. „Ég nýtti reynslu mína sem framleiðandi til þess að hanna verkefnið sem fékk nafnið Geðveik jól. Orðið „geðveik“ til að minna okkur á mikilvægi góðrar geðheilsu og „jól” vegna þess að desember er sá mánuður sem fólk fer oft á yfirsnúning og gleymir að hlúa að geðheilsunni.“

Keppnin sjálf gengur út að safna áheitum en hvert fyrirtæki safnar til stuðnings góðu málefni. Fyrirtækið sem safnar hæstu upphæðinni vinnur sér inn þrjú stig en sérstök dómnefnd, skipuð tónlistarfólki með ólíkan bakgrunn, gefur einnig. „Lögin mega ekki vera lengur en 3 mínútur og starfsmenn eiga að vera í aðalhlutverki þótt aðstoð fjölskyldumeðlima, vina og viðskiptavina sé leyfð.“

Hæfileikar eru víða

Sjónvarpsþættir um Geðveik jól hafa verið sýndir á RÚV undanfarin ár og er þátturinn einn sá vinsælasti á sjónvarpsstöðinni í desembermánuði. „Um þessar mundir hef ég í samstarfi við Sagafilm Nordic unnið að því að koma verkefninu á dagskrá hjá Norðurlandaþjóðunum. Það verður spennandi að sjá hvort þær komi til með að halda Geðveik jól eins og við í náinni framtíð.“

Framleiðsla jólalaganna og myndbandanna hefst í nóvember og segir Bjarney magnað að fylgjast með metnaði þátttakenda undanfarin ár. „Það er öllu til tjaldað og keppnisandinn er mikill, ekkert ósvipað og í Eurovision. Það ætla allir að vinna! Það hefur sýnt sig að tónlistahæfileikar leynast alls staðar, á færiböndum og í fundarherbergjum. Geðveik jól hefur verið frábært vettvangur fyrir óslípaða tónlistasnillinga til að láta ljós sitt skína.“

Hún segir löngu ljóst að verkefnið hafi jákvæð áhrif á vinnustaði og fólkið sem vinnur þar. „Þessi keppni er líka frábær leið til þess að kynna fyrirtækið, rekstur þess og ímynd í gegnum söng , gleði og mannauð.“

Áætlað er að fyrsti sjónvarpsþáttur um Geðveik Jól 2015 fari í loftið 3. desember og verða þá öll lögin frumsýnd og fyrirtækin kynnt til leiks. Þátttakendur í ár eru Virtus, Bestseller, Toyota, Hamborgarabúllan, Löður, LS Retail, DoHop og Kjarnafæði. „Átta geðveik fyrirtæki sem eru nú þegar byrjuð að undirbúa, semja og útsetja lögin sín.“

Hægt er að fylgjast með framvindu átaksins inn á  facebook.com/www.gedveikjol.is.