Rutenka farinn frá Barcelona

Barcelona hefur leyst handboltamanninn Siarhei Rutenka undan samningi við félagið.

Rutenka, sem er 34 ára, lék með Barcelona í sex ár en hann kom til Katalóníuliðsins frá Ciudad Real árið 2009.

Rutenka varð fimm sinnum spænskur meistari með Barcelona, fjórum sinnum bikarmeistari, auk þess sem hann vann Meistaradeild Evrópu í tvígang með liðinu. Rutenka var samherji Guðjóns Vals Sigurðssonar síðasta tímabilið sitt hjá Barcelona.

Spænska blaðið Marca hefur orðað Rutenka við lið í Katar en óvíst er hvert næsta skref hans á ferlinum verður.

Rutenka hefur leikið fyrir tvö landslið; heimalandið Hvíta-Rússland og svo Slóveníu þar sem hann lék um tíma, fyrst með Velenje og svo Celje. Hann er einnig með spænskt ríkisfang en lék þó aldrei með spænska landsliðinu.