Ætlar að kenna íslenskum konum bestu brögðin í leitinni að „Mr Right“

Linda Baldvinsdóttir markþjálfi ætlar að gera íslenskar einhleypar konur í stakk búnar til að hitta hinn eina fullkomna, „Mr. Right“. Hún stendur fyrir námskeiði um miðjan mánuðinn þar sem skoðaðar verða lykilspurningar til að spyrja að á fyrsta stefnumóti, hvar konur þurfa að vera staddar fyrir hitting með hinum fullkomna manni og sömuleiðis verður farið í nokkur vel valin förðunarbrögð, makeup trix.

„Ég hef náttúrulega sjálf verið ein í fimm ár og farið á nokkur vandræðaleg date.Þar er setið yfir einum kaffibolla og maður mælir manneskjuna út, athugar hvort hún henti útlitslega, en veit afskaplega takmarkað um hana eftir þennan kaffibolla,“ segir Linda við Vísi.

„Þetta verður alltaf vandræðalegt og mér finnst þetta oft eins og nautgripasýningar.“

Freyðivín og konfekt

Linda segist hafa rekist á fyrirlestur um daginn á netinu. Sú sem hélt fyrirlesturinn vísaði í rannsókn Arthurs Aron og fleiri við ríkisháskóla í New York. Fyrirlesturinn fékk mikið áhorf að sögn Lindu sem kynnti sér rannsókn Arthur til hlýtar.

„Ég sá að þarna er komin hin fullkomna aðferð til að fara á fyrsta stefnumót.“

Hún lofar skemmtilegu kvöldi þann 14. október í Hverafold 1-3 klukkan 20. 

„Við ætlum að hafa þetta huggulegt, bjóðum upp á freyðivín og konfekt, og förum yfir þá hluti sem þurfa að vera í lagi hjá okkur sjálfum áður en við förum í sambönd.

Linda minnir á að sem markþjálfi vinni hún með fólk og viti hvað þurfi að koma til í samböndum. Sérstaklega í seinni samböndum en einnig í fyrri séu ákveðnir þættir sem hver og einn þurfi að hafa í lagi. Þau ætli að fara saman yfir fyrrnefndar spurningar sem eru 36.

„Svo endum við kvöldið á makeup trixum svo konur geti haldið í sjálfstraustið á meðan þær ganga í gegnum þetta.“

Í spor Carrie Bradshaw

Blaðamaður viðurkennir seint að vera aðdáandi sjónvarpsþáttanna Sex and the City þrátt fyrir að hafa séð ófáa þættina á sínum tíma. Í einum þáttanna heldur aðalpersónan Carrie Bradshaw námskeið ekki ósvipað því sem Linda virðist ætla að halda.

Í harðbakka slær þegar gestir átta sig á því að Carrie sjálf er einhleyp og upp vaknar spurningin hvað í ósköpunum hún geti kennt þeim enda ekki sjálf búin að finna hinn eina sanna. Linda hefur ekki séð umræddan þátt en skellir upp úr.

„Ég lít á þetta svo að við erum öll á þessu ferðalagi að leita. Þarna er maður (Arthur Aron) búinn að sannreyna hlutina,“ segir Linda og vísar í fyrrnefnda rannsókn.

Að neðan má sjá brot úr umræddum Sex and the City þætti þar sem Carrie Bradshaw hættir kennslu í sal og fer með stelpurnar í verklega kennslu í staðinn.

„Ég veit sjálf sem markþjálfi hvað þarf að vera í lagi hjá okkur sjálfum. Hvernig við eigum að fara inn í samböndin. Veit hversu mikið góð samskipti skipta máli, hvernig við tæklum smámálin í samböndunum okkar og að við samþykkjum hinn aðilinn eins og hann er.“

Auk þess sé lykilatriði að vera laus úr fyrri samböndum, jafnt líkamlega sem andlega. 

„Maður þarf að vera búinn að gera upp fyrri sambönd.“

Kannski karlakvöld seinna

Á tímum mikillar umræðu um aukið jafnrétti, frelsi kvenna og femínisma kemur vafalítið mörgum spánskt fyrir sjónir að einhver ætli að bjóða upp á námskeið til að hjálpa konum í stefnumótaheiminum. Í leit að hinum fullkomna maka.

Linda segir að þau hafi ákveðið að halda námskeið fyrir konur núna en gætu vel haldið námskeið fyrir karla síðar meir enda gildi aðferðirnar fyrir bæði kynin. Varðandi það að fá góð förðunarráð segir Linda það einfaldlega staðreynd að konur eru, upp til hópa, með afar bágborið sjálfstraust

„Það verður bara að segjast eins og er. Megnið af konum er með afar lélegt sjálfstraust. Það sem þú þarft þegar þú ferð á svona date er að hafa það í toppi hvað þig sjálfa varðar.“

Hún bendir á að snyrtivöruiðnaðurinn sé einn sá stærsti í heiminum og konur eigi það sameiginlegt að vilja allar líta vel út.

„Ef ég væri með karlakvöld væri ég líka með Sollu (Sólveigu  þar. Við þurfum að sýna hver við erum og líta vel út til þess að við séum með sjálfstraustið í hámarki á svona erfiðum stundum. Ef ekki, þú ræður því, en þarna færðu allavega ráðin ef þú þarft á þeim að halda.“